چیئرمین سینیٹ محمد صادق سنجرانی نے کہا ہے کہ دہشت گرد پوری انسانیت کے دشمن ہیں۔

محمد صادق سنجرانی نے لاہور نیو انار کلی کے قریب ہونے والے دھماکے کی شدید مزمت کی ہے، انہوں نے دھماکے کے نتیجے میں جاں بحق ہونے والوں کی بلند درجات کے لئے دعا کی۔

ان کا کہنا تھا کہ دھماکے میں زخمی ہونے والوں کی جلد صحتیابی کیلئے دعا گو ہیں۔

انہوں نے کہا کہ اس طرح کی تخریبی کارروائیوں سے ملک کے امن کو نقصان پہنچانے کی ہر کوشش ناکام ہوگی، دہشت گرد پوری انسانیت کے دشمن ہیں۔

چیئرمین سینیٹ محمد صادق سنجرانی نے مزید کہا کہ ملک دشمن عناصر کو ملک میں قربانیوں سے حاصل کیا گیا امن سبوتاژ نہیں کرنے دیں گے، تمام اداروں اور عوام کو بحیثیت قوم متحد ہو کر دہشت گردی کا قلع قمع کرنا ہوگا۔

ڈپٹی چیئرمین سینیٹ مرزا محمد آفریدی، سینیٹ میں قائد ایوان ڈاکٹر شہزاد وسیم اور سینیٹ میں قائد حزب اختلاف سید یوسف رضا گیلانی نے بھی لاہور دھماکے کی شدید الفاظ میں مزمت اور جاں بحق افراد کی بلند درجات کی دعا کی ہے۔

واضح رہے کہ لاہور کے علاقے نیو انار کلی پان منڈی میں دھماکا ہوا ہے جس میں 3 افراد جاں بحق جبکہ 20 زخمی ہوگئے ہیں۔

لاہور کے علاقے نیو انار کلی بازار کی پان منڈی میں عین اس وقت دھماکا ہوا جب لوگوں کی بڑی تعداد وہاں موجود تھی۔

دھماکا اس قدر شدید تھا کہ اس سے 6 موٹر سائیکلیں اور اردگرد کی دکانیں تباہ جبکہ گاڑیوں میں بھی آگ گئی۔

دھماکے کے زخمیوں کو فوری طور پر قریبی اسپتال منتقل کردیا گیا۔

طبی عملے نے 3 افراد کے جاں بحق ہونے کی تصدیق کردی ہے جب کہ 20  زخمیوں کو طبی امداد فراہم کی جارہی ہے۔

سیکیورٹی فورسز نے علاقے کو گھیرے میں لے کر سرچ آپریشن شروع کردیا ہے جب کہ پولیس کی خصوصی ٹیمیں شواہد اکٹھا کررہی ہیں۔

ڈی آئی جی آپریشنز کا کہنا ہے کہ ابتدائی شواہد سے ایسا لگتا ہے کہ دھماکے میں موٹرسائیکل استعمال کی گئی ہے۔