یورپی ملک ڈنمارک کی وزیر صحت نے دعویٰ کیا ہے کہ اومیکرون دو ماہ میں وبا کا خاتمہ کر دے گا۔

غیر ملکی خبررساں ادارے کے مطابق ڈنمارک کے وزارت صحت کی جانب سے دعویٰ کیا گیا ہے کہ کورونا وائرس کا نیا ویرینٹ اومیکرون اس عالمی وبا کا خاتمہ کردے گا اور اگلے دو ماہ میں سب کچھ معمول پر آجائے گا جیسے پہلے ہوا کرتا تھا۔

یہ بھی پڑھیں؛ اومیکرون بڑی عمر کے افراد کے لئے زیادہ خطرناک

ڈنمارک کے وبائی امراض کے ماہر نے میڈیا کو دیے گئے بیان میں کہا کہ ڈنمارک کے اسٹیٹ سیرم انسٹیٹوٹ میں کی گئی حالیہ تحقیق میں یہ بات سامنے آئی ہے کہ اومیکرون سے اسپتال میں داخل ہونے کا رجحان بہت کم ہے اور یہ وائرس ڈیلٹا سے کم خطرناک ہے۔

خیال رہے برطانیہ اور جنوبی افریقا میں کی گئی تحقیقات میں بھی یہی بات سامنے آئی ہے کہ اومیکرون ، ڈیلٹا وائرس کے مقابلے میں زیادہ خطرناک نہیں اور اومیکرون سے وینٹی لیٹر پر پہنچنے کا امکان بھی نہ ہونے کے برابر ہے جب کہ اومیکرون کے مریض بہت جلد صحتیاب بھی ہوجاتے ہیں۔

انہوں نے کہا کہ اس تحقیق کے بعد ڈنمارک کے حکام میں یہ امید پیدا ہوگئی ہے کہ اگلے دو ماہ میں حالات واپس نارمل ہوجائیں گے اور اومیکرون اس وبا کا خاتمے کا باعث بنے گا۔

یہ بھی پڑھیں؛ اومیکرون ڈیلٹا سے زیادہ خطرناک نہیں، محققین کا دعویٰ

دنیا بھر میں اومیکرون کی شدت میں اضافے سے متعلق پوچھے گئے سوال پر انہوں نے جواب دیا دراصل اومیکرون کیسز میں اضافہ ہی اس وبا کو خاتمے کی طرف لے جائے گا اور اومیکرون کے پھیلاؤ کے خدشے کے باوجود یہ بہت جلد ہمیشہ کے لیے ختم ہوجائے گا۔

وزارت صحت کے ماہرین کا کہنا ہے کہ اومیکرون بہت تیزی سے پھیلنے والا وائرس ہونے کے باوجود اس کی شدت بہت زیادہ نہیں ہے اور اس سے بہت زیادہ لوگ متاثر ہوں گے لیکن ان افراد میں کوئی خطرے والی بات نہیں ہوگی اور وہ جلد ٹھیک ہوجائیں گے۔