کورونا وائرس کے نئے ویرینٹ اومیکرون سے بھی تیزی سے پھیلنے والا اور خطرناک ویرینٹ سامنے آگیا۔

غیر ملکی خبررساں ادارے کی رپورٹ کے مطابق کورونا وائرس کے نئے ویریںٹ اومیکرون کا سب ویرینٹ ’’بی اے ٹو‘‘ پہلی بار الجزائر میں رپورٹ ہوا ہے۔

برطانیہ کی ہیلتھ سیکیورٹی ایجنسی کے ترجمان کا کہنا ہے کہ اومیکرون کا ویرینٹ ’’بی اے ٹو‘‘ بہت تیزی سے پھیل رہا ہے اور یہ اومیکرون کی پہلی ٹائپ ’’بی اے ون‘‘ سے بھی زیادہ خطرناک ثابت ہوسکتا ہے۔

یہ بھی پڑھیں؛ دو سال تک کورونا سے بچنے والا ملک اومیکرون سے نہ بچ سکا

ہیلتھ ایجنسی کے چیف میڈیکل ایڈوائزر ڈاکٹر سسان ہاپکنز نے کہا کہ اگر برطانیہ میں اومیکرون کی دونوں ٹائپ کا موازنہ کیا جائے تو ملک کے تمام علاقوں میں ’’بی اے ٹو‘‘ کی شرح بہت زیادہ ہے ۔

انہوں نے کہا کہ اومیکرون کی دونوں ٹائپ کی شدت کو لیکر کوئی ڈیٹا موجود نہیں ہے تاہم ’’بی اے ون‘‘ ، ’’بی اے ٹو‘‘ کے لیے کورونا ویکسین کے اثرات میں کوئی فرق محسوس نہیں کیا گیا ہے۔

کورونا وائرس کے نئے ویرینٹ اومیکرون کے ’’بی اے ون‘‘ برطانیہ بھر میں بہت تیزی سے پھیلا تھا اور اس نے ڈیلٹا ویرینٹ کے مقابلے میں کورونا کیسز کے تمام ریکارڈ توڑ دیے تھے تاہم ’’بی اے ٹو‘‘ سے اب تک اسپتال میں داخل ہونے والے کیسز میں کوئی واضح اضافہ نہیں دیکھا گیا۔

واضح رہے اومیکرون کی علامات ڈیلٹا کے مقابلے میں اکثر ہلکے ہوتے ہیں اور کچھ متاثرہ افراد میں کوئی ظاہر نہیں ہوتا، لیکن فلو کی طرح یہ جان لیوا ہو سکتا ہے خاص طور پر ان لوگوں کے لیے جو بڑی عمر کے ہیں، صحت کے دیگر مسائل ہیں یا جنہیں ویکسین نہیں دی گئی ہے۔