مری میں گزشتہ برفباری کے باعث مختلف گاڑیوں میں 22 افراد دم گھٹ کر جاں بحق ہوگئے ہیں جب کہ پاک فوج کے دستے امدادی کارروائیوں میں مصروف ہیں۔

مری اور گلیات میں گزشتہ چند روز سے برفباری لا سلسلہ جاری ہے، گزشتہ روز عوام کی بڑی تعداد برفباری سے لط ف اندوز ہونے کے لئے پہنچی تھی۔

شدید برفباری میں ٹریفک جام ہونے کے بعد بڑی تعداد اپنی گاڑیوں میں ہی محصور ہوکر رہ گئی تھی۔ ان ہی میں وہ بدقسمت افراد بھی شامل تھے جو اپنی گاڑیوں میں دم گھٹنے سے زن دگی کی بازی ہار گئے۔

اے ایس آئی نوید بھی اہلخانہ کے 8 افراد سمیت موت کے منہ میں چلے گئے

وزیر اعلیٰ پنجاب کو بھجوائی گئی حکومتی رپورٹ میں کہا گیا ہے کہ 2 روزکے دوران مری میں 5فٹ برف پڑی ، فارکاسٹ الرٹ کے تناظر میں گاڑیوں کا داخلہ مری میں بند کر دیا گیا تھا۔

رپورٹ میں کہا گیا ہے کہ درخت گرنے سے اموات نہیں ہوئیں، اب تک 22 افراد جاں بحق ہوچکے ہیں، چار گاڑیوں میں لوگ تھے وہاں پر سردی تھی ،اموات کی حتمی رپورٹ ریسکیو دے گا۔

جان کی بازی ہارنے والوں راولپنڈی کے تھانہ کوہسار میں تعینات اے ایس آئی نوید اور ان کے 7 اہل خانہ بھی شامل ہیں۔

وزیراعظم کا تحقیقات کا حکم

اپنی ٹوئٹ میں وزیر اعظم نے کہا کہ مری میں ہونے والے سانحے پر وہ بہت غمزدہ ہیں۔ غیرمعمولی برفباری اور موسمی حالات کا جائزہ لیے بغیر لوگ وپاں پہنچے اور ضلعی انتظامیہ اس کے لئے تیار ہی نہیں تھی۔

سانحہ مری کے حوالے سے وزیر اعظم نے مزید کہا کہ انہوں نے اس واقعے کی انکوائری کا حکم دیا دے دیا ہے۔

Shocked & upset at tragic deaths of tourists on road to Murree. Unprecedented snowfall & rush of ppl proceeding without checking weather conditions caught district admin unprepared. Have ordered inquiry & putting in place strong regulation to ensure prevention of such tragedies.

— Imran Khan (@ImranKhanPTI) January 8, 2022

عثمان بزدار کا اظہار تعزیت

وزیراعلیٰ پنجاب عثمان بزدار نے جاں بحق افراد کے لواحقین سے دلی ہمدردی اور اظہار تعزیت کیا ہے۔

پاک فوج کی امدادی کارروائیاں

آئی ایس پی آر کے مطابق مری میں ریسکیو اور ریلیف سرگرمیاں بھرپور انداز میں جاری ہیں، ایف ڈبلیو او اور آرمی انجینئرز نے مری ایکسپریس وے ٹریفک کیلئے کھول دی ہے۔

پاک فوج کی جانب سے متاثرین کیلئے مختلف مقامات پر 4 ریلیف کیمپ قائم کردیئے گئے، یہ کیمپس ملٹری کالج مری، جھیکا گلی، اے پی ایس کولڈنہ اور سنی بینک سپلائی ڈپو میں کیمپ قائم کئے گئے ہیں۔

آپریشن رات سے ہی شروع ہو گیا تھا، میجر جنرل واجد عزیز

 مری ڈویژن کے کمانڈنگ آفیسر میجر جنرل واجد عزیز نے میڈیا سے گفتگو کرتے ہوئے کہا ہے کہ ملٹری پولیس کے اہلکار سول ایڈمینسٹریشن کے ساتھ مل کر ٹریفک کو دیکھ رہے تھے۔

انہوں نے کہا کہ رات کو آرمی چیف نے کہا کہ ہدایات کا انتظار کئے بغیر مکمل تعاون کریں ، کوشش یہ ہو کہ تمام لوگوں کو امداد پہنچائی جائے ، کسی سیاح کو بھی پریشانی کا سامنا نہ کرنا پڑے۔

متاثرہ خاندانوں سے تعزیت کرتا ہوں، شہباز شریف

پاکستان مسلم لیگ (ن) کے صدر اور قائد حزب اختلاف شہباز شریف کا مری اور گلیات میں رش میں پھنسی گاڑیوں میں اموات پر رنج وغم اور افسوس کااظہار ہے۔

شہباز شریف نے کہا کہ اس حکومت کی انتظامی صلاحیت کا عالم یہ ہے کہ مری اور گلیات میں ٹریفک انتظامات کرنے کے قابل بھی نہیں، اگر حکومت ایک ہزار گاڑیوں کے انتظام کی بھی صلاحیت نہیں رکھتی تو پھر اسے اقتدار میں رہنے کا کیا اور کیوں حق ہے؟

’’سانحات سے محفوظ رہنے کا حل نااہل حکمران کو گھر بھیجنا ہے‘‘

پاکستان پیپلزپارٹی کے پی پی پنجاب ایگزیکٹوز کے اجلاس میں چیئرمین بلاول بھٹو زرداری نے کہا کہ سانحہ مری کے بعد پورا ملک سوگ میں ڈوب گیا ہے۔

انہوں نے کہا کہ سانحہ مری نااہلی کا نتیجہ ہے اور ایسے المناک سانحات سے محفوظ رہنے کا حل نااہل حکمران کو گھر بھیجنا ہے۔

اس سے قبل پاکستان پیپلزپارٹی کے چیئرمین بلاول بھٹو زرداری نے مری میں سرد موسم سے سیاحوں کے جاں بحق ہونے پر اظہار افسوس کیا اور جاں بحق ہونے والے سیاحوں کے لواحقین سے اظہار تعزیت کیا۔

انہوں نے کہا کہ مری میں افسوس ناک سانحے پر پورا ملک سوگوار ہے ، بہتر ہوتا کہ مری میں سیاحوں کو سنگین صورت حال سے آگاہ کیا جاتا تاکہ ایسا سانحہ رونما نہ ہوتا۔

بلاول بھٹو زرداری نے کہا کہ انتظامیہ سیاحوں کی فی الفور مدد کے لیے ہنگامی اقدامات کرے۔

ضلعی انتظامیہ کا کہنا ہے کہ 23 ہزار گاڑیوں کو مری سے نکالا جا چکا ہے، جب کہ ایک ہزار کے قریب گاڑیاں تاحال پھنسی ہوئی ہیں، کسی بھی ایمرجنسی کی صورت میں 0519292963 رابطہ کیا جا سکتا ہے۔

ایمرجنسی نافذ

تحصیل ہیڈ کوارٹر اسپتال مری میں ایمرجنسی نافذ ہے، اسپتال کے میڈیکل سپرنٹینڈنٹ ڈاکٹر عبدالسلام عباسی کا کہنا ہے کہ اسپتال کا عملہ کسی بھی ہنگامی صورتحال سے نمٹنے کے لئے پوری طرح سے تیار ہے، اسپتال میں تمام ایمرجنسی ادویات بھی موجود ہیں۔

وزیر اعلٰی عثمان بزدار نے ہدایت کی ہے کہ پھنسے ہوئے لوگوں کو کھانے پینے کی اشیاء ،چائے اور دیگر امدادی سامان فی الفور مہیا کیا جائے۔

مزید پڑھیے: مری میں سیاحوں کی سہولت کیلئے ضروری ہدایات

عوام کی سہولت اور معلومات کے لیے ڈپٹی کمشنر راولپنڈی اور اسسٹنٹ کمشنر مری کے دفتار میں کنٹرول رومز بھی قائم کردئیے گئے ہیں۔

بجلی بحال

اس کے علاوہ مری کے 70فیصد علاقوں میں بجلی بھی بحال کردی گئی ہے۔

عوام سے ایپل

دوسری جانب عوام سے اپیل کی جارہی ہے کہ موسم کو ملحوظ خاطر رکھتے ہوئے مری جانے سے گریز کریں-

گلیات  میں بھی صورت حال خراب

مری کے علاوہ گلیات میں بھی شدید برفباری کے باعث سیاحوں کا داخلہ بند کردیا گیا ہے۔

گلیات اور اطراف کے علاقوں میں برفباری کا سلسلہ گزشتہ 5 روز سے جاری تھا لیکن جمعے کو ہونے والی برف باری انتہائی شدید تھی۔ صرف ایک روز میں تین فٹ برفباری ہوئی ہے۔

گلیات ڈویلپمنٹ اتھارٹی کے ترجمان احسن حمید نے عوام سے اپیل کی ہے کہ وہ انتظامیہ اور پولیس سے تعاون کریں۔

مری اور گلیات کے علاوہ گلگت بلتستان اور آزاد کشمیر کے بعض علاقوں میں بھی گزشتہ 4 روز سے برفباری کا سلسلہ وقفے وقفے سے جاری رہا۔

مری میں 10 سالوں کے دوران ریکارڈ برفباری

رپورٹ کے مطابق جنوری سے  اب تک 32 انچ برفباری ریکارڈ کی گئی ہے جب کہ 94 ملی میٹر بارش ریکارڈ ہوئی ہے۔

دوسری جانب محکمہ موسمیات نے مری میں مزید برف باری کی پیشگوئی کر دی ہے۔

محکمہ موسمیات کی جانب سے جاری کیے گئے  اعلامیہ کے مطابق مری میں اب تک 3 فٹ سے زائد یعنی 37 اشاریہ 72 انچ برف پڑ چکی ہے۔

اعلامیہ کے مطابق موسم سرما کے دوران مری میں اوسط 64 اشاریہ 7 انچ برف باری ہوتی ہے جبکہ جنوری کے ماہ میں اوسط 23 اشاریہ 2 انچ برف باری ہوتی ہے۔