صوبائی وزیر صحت ڈاکٹر یاسمین راشد نے کہا ہے کہ انار کلی بم دھماکے کے زخمیوں کی فہرست ہسپتال میں چسپاں کی جائے۔

ڈاکٹر یاسمین راشد نے انار کلی بم دھماکے کی شدید مذمت کرتے ہوئے کہا کہ قیمتی انسانی جانوں کے ضیاع پر گہرا دکھ اور افسوس ہے۔

ڈاکٹر یاسمین راشد نے انار کلی بم دھماکے کے زخمیوں کے بہترین علاج معالجہ کی ہدایت کرتے ہوئے کہا کہ مئیو ہسپتال میں تمام ڈاکٹرزاور اسٹاف حاضر رہے، ایم ایس مئیو ہسپتال ڈاکٹر افتخار بم دھماکے کے تمام زخمیوں کا اپنی نگرانی میں علاج کروا رہے ہیں۔

  سیکرٹری محکمہ اسپیشلائزڈہیلتھ کئیراینڈمیڈیکل ایجوکیشن ڈاکٹر احمد جاوید قاضی نے مئیو ہسپتال کے تمام سینئر ڈاکٹرز اور اسٹاف کو الرٹ رہنے کی ہدایت کردی۔

صوبائی وزیر صحت ڈاکٹر یاسمین راشد کا کہنا تھا کہ انار کلی بم دھماکے کے زخمیوں کی فہرست ہسپتال میں چسپاں کی جائے، لواحقین مریضوں کے علاج معالجہ میں ہسپتال انتظامیہ سے تعاون کرے۔

واضح رہے کہ لاہور کے علاقے نیو انار کلی پان منڈی میں دھماکا ہوا ہے جس میں 3 افراد جاں بحق جبکہ 20 زخمی ہوگئے ہیں۔

لاہور کے علاقے نیو انار کلی بازار کی پان منڈی میں عین اس وقت دھماکا ہوا جب لوگوں کی بڑی تعداد وہاں موجود تھی۔

دھماکا اس قدر شدید تھا کہ اس سے 6 موٹر سائیکلیں اور اردگرد کی دکانیں تباہ جبکہ گاڑیوں میں بھی آگ گئی۔

دھماکے کے زخمیوں کو فوری طور پر قریبی اسپتال منتقل کردیا گیا۔

طبی عملے نے 3 افراد کے جاں بحق ہونے کی تصدیق کردی ہے جب کہ 20  زخمیوں کو طبی امداد فراہم کی جارہی ہے۔

سیکیورٹی فورسز نے علاقے کو گھیرے میں لے کر سرچ آپریشن شروع کردیا ہے جب کہ پولیس کی خصوصی ٹیمیں شواہد اکٹھا کررہی ہیں۔

ڈی آئی جی آپریشنز کا کہنا ہے کہ ابتدائی شواہد سے ایسا لگتا ہے کہ دھماکے میں موٹرسائیکل استعمال کی گئی ہے۔