بلاول بھٹو نے کہا ہے کہ عوام کا مطالبہ ہے کہ حکومت کے خلاف احتجاج کیا جائے۔

پاکستان پیپلزپارٹی کے چیئرمین بلاول بھٹو زرداری نے پارلیمنٹ ہاؤس میں اپنے چیمبر کے باہر پریس کانفرنس کرتے ہوئے کہا ہے کہ حکومت نے پارلیمنٹ سے زبردستی ایک بجٹ منظور کروایا ، پیپلزپارٹی نے پارلیمنٹ کے اندر اور باہر اجتجاج کیا۔

انہوں نے کہا کہ منی بجٹ کی منظوری کے وقت کئے جانے والے وعدے پورے نہیں کیے ، منی بجٹ کے نتیجے میں مہنگائی کا اثر عوام پر پڑے گا ، عوام کا مطالبہ ہے کہ حکومت کے خلاف احتجاج کیا جائے ، پیپلزپارٹی 27 فروری کو کراچی سے نکلے گی۔

بلاول بھٹو زرداری نے کہا ہے کہ ہم جمہوری لوگ ہیں اور جمہوریت پر یقین رکھتے ہیں ، پہلے دن سے عدم اعتماد لانے کا مطالبہ تھا کہ جمہوری طریقے سے ان کو نکالا جائے ، عوام کا مطالبہ ہے کہ ہم ان کو عمران سے نجات دلائیں۔

پاکستان پیپلزپارٹی کے چیئرمین نے کہا ہے کہ آئی ایم ایف کے پاس جا کر مذاکرات کر سکتے ہیں ، عوام کو اس بحران سے نکال سکتے ہیں ، منی بجٹ رات کے اندھیرے میں منظور کروایا گیا ، اسٹیٹ بینک کا بل بھی زبردستی منظور کروایا گیا۔

انہوں نے کہا کہ اسٹیٹ بینک عدلیہ اور عوام کا جوابدہ نہیں ہو گا اور آئی ایم ایف کے کہنے پر چلے گا ، اسٹیٹ بینک کی غلامی کے بل سے حکومت نے ہماری معیشت پر اور آزادی پر حملہ کیا ہے ، آئین و قانون میں صدارتی ایمرجنسی کی گنجائش نہیں ہے۔

بلاول بھٹو زرداری نے کہا ہے کہ جب بھی زبر دستی صدارتی نظام لانے کی کوشش کی گئی ملک ٹوٹا ، صدارتی نظام کا شوشہ چھوڑنے والے ٹرک کی بتی کے پیچھے لگا رہے ہیں تاکہ ہم مہنگائی ، بے روزگاری کی بات نہ کریں۔