وزیراعظم سے گورنر سندھ نے ملاقات کی ہے۔

وزیراعظم عمران خان سے گورنر سندھ عمران اسماعیل نے ملاقات کی جس میں سندھ کی ترقی سے متعلق امور پر تبادلہ خیال کیا گیا۔

ملاقات میں وزیراعظم کو سندھ کی صوبائی حکومت کی 3 سالہ کارکردگی پرتفصیلی بریفنگ دی گئی۔

وزیر اعظم نے اسد عمر کے ساتھ مل کر صوبے میں جاری تمام ترقیاتی اسکیموں پر کام کی رفتار کو تیز کرنے کی ہدایت دی۔

واضح رہے کہ اس سے قبل اسلام آباد میں تقریب سے خطاب کرتے ہوئے وزیراعظم عمران  خان نے کہا تھا کہ چھوٹے کاروباری افراد کیلئے قرضوں کی سہولت پیدا کی ہے جب کہ ماضی میں چھوٹے سرمایہ کاروں کوبینک قرضے نہیں دیتا تھا۔

انہوں نے کہا تھا کہ ریاست کو نوجوانوں کی مدد کرنا ہو گی، نوجوانوں کے اندر زیادہ جنون ہوتا ہے، نوجوانوں کے پاس بہت آئیڈیاز ہوتے ہیں، ہم کاروبار کرنے والوں کےلیےآسانیاں پیدا کررہےہیں۔

وزیراعظم نے کہا ماضی کے غلط فیصلوں کی وجہ سے ملک نیچے گیا، ہمیں شرم آتی ہے اتنی آبادی کے باوجود برآمدات چھوٹے ممالک سے کم ہیں۔

ان کا کہنا تھا کہ چھوٹے چھوٹے ممالک برآمدات میں ہم سے آگے نکل گئے،اب ہمیں برآمدات بڑھانے پر توجہ دینا ہو گی، رکاوٹیں ڈالنے والوں کے خلاف ایکشن لیں گے۔

عمران خان کا کہنا تھا کہ کورونا کی ایک اور لہر آرہی ہے لیکن ہم اپنی معیشت بند نہیں کریں گے۔

وزیراعظم نے کہا تھا کہ 22کروڑ کے ملک میں صرف 20لاکھ لوگ ٹیکس دیتے ہیں، بہت سارے لوگ ہیں جو ٹیکس ہی نہیں دیتے۔