ایران کے سپریم لیڈر آیت اللہ خامنہ ای کے ٹوئٹر اکاؤنٹ کو سابق امریکی صدر ڈونلڈ ٹرمپ کے قتل کی ویڈیو جاری کرنے کے بعد بند کردیا گیا۔

چند روز قبل ایرانی سپریم لیڈر آیت اللہ خامنہ ای سائٹ پر امریکا کے سابق صدر ڈونلڈ ٹرمپ کو قتل کرنے کی اینیمیٹڈ ویڈیو جاری کی گئی تھی۔ یہ ویڈیو ایرانی جنرل قاسم سلیمانی کے قتل کی برسی کے موقع پر ریلیز کی گئی ہے جسے ٹرمپ حکومت کے دوران امریکی فوج نے بغداد میں ایک ڈرون حملے میں قتل کیا تھا۔

ٹوئٹر انتظامیہ کی جانب سے ڈونلڈ ٹرمپ کے قتل کی ویڈیو جاری کیے جانے کے بعد ایرانی سپریم لیڈر کا ٹوئٹر اکاؤنٹ بند کردیا گیا ہے۔

یہ بھی پڑھیں؛ ایران نے ڈونلڈ ٹرمپ کے قتل کی ویڈیو جاری کردی

خیال رہے خامنہ ای سائٹ ان اکاؤنٹس میں سے ایک ہے جسے سپریم لیڈر کا دفتر براہِ راست کنٹرول کرتا ہے۔

https://twitter.com/Hassanvand/status/1481571707504705538

ٹوئٹر کے ترجمان کی جانب سے اکاؤنٹ بند کیے جانے سے متعلق بتایا گیا کہ ٹویٹر کی پالیسی کی خلاف ورزی کرنے پر ایرانی سپریم لیڈر کے اکاؤنٹ پر پابندی عائد کی گئی۔

ایران کے سپریم لیڈر کے اکاؤںٹ سے جاری ہونے والی ویڈیو میں جدید ترین ڈرون ٹیکنالوجی کا استعمال کرتے ہوئے ایک روبوٹ کے ذریعے ڈرون حملے میں سابق امریکی صدر ڈونلڈ ٹرمپ کی ہلاکت کی فرضی منظر کشی کی گئی ہے۔