عدالت نے آشیانہ اقبال ریفرنس کیس میں شہباز شریف کے شریک ملزمان  کی بریت کی درخواستیں مسترد کر دیں۔

احتساب عدالت نے ملزم بلال قدوائی اور امتیاز حیدر کی بریت کی درخواستوں پر محفوظ فیصلہ سناتے ہوئے ریمارکس دیے کہ ملزمان نیب ترمیمی آرڈیننس کے تحت رعایت کے حقدار نہیں ہیں۔

عدالت نے آئندہ سماعت 7 فروری کو نیب کے گواہوں کو طلب کر لیا۔

ملزمان نے نیب کے نئے ترمیمی آرڈینس کے تحت بریت کی درخواست دائر کی تھی۔

اس سے قبل احتساب عدالت لاہور میں آشیانہ اقبال ریفرنس کیس کی سماعت ہوئی۔

احتساب عدالت لاہور نے آشیانہ اقبال ریفرنس کیس میں شہباز شریف کے 2 شریک ملزمان بلال قدوائی اور امتیاز حیدر کی بریت کی درخواستوں پر فیصلہ محفوظ کیا تھا۔

شہباز شریف کے دو شریک ملزمان امتیاز حیدر اور بلال قدوائی نے عدالت میں بریت کی درخواستیں دائر کر رکھی تھیں جس پر احتساب عدالت نے شہباز شریف سمیت دیگر کے خلاف آشیانہ اقبال ریفرنس کیس کی سماعت 27 جنوری تک ملتوی کی۔

احتساب عدالت نے کرونا کے باعث شہباز شریف کی حاضری معافی کی درخواست بھی منظور کی۔

عدالت نے احد چیمہ سمیت دیگر ملزمان کی حاضری مکمل کرنے کے بعد سماعت ملتوی کرتے ہوئے آئندہ سماعت پر نیب کے گواہوں کو بیانات قلم بند کروانے کے لیے طلب کر لیا۔

دوسری جانب لاہور کی احتساب عدالت میں قائدِ حزبِ اختلاف پنجاب اسمبلی حمزہ شہباز نے رمضان شوگرملز ریفرنس میں بریت کی درخواست واپس لے لی۔

حمزہ شہباز نے بریت کے لیے نئے ترمیمی آرڈیننس کا فائدہ لینے سے انکار کرتے ہوئے عدالت میں بیان دیا کہ مجھے یقین ہے کہ میری میرٹ پر بریت ہوگی۔ مجھے عدالت پر مکمل اعتماد ہے۔

حمز شہباز کے وکیل نے کہا کہ حمزہ شہباز کی میرٹ پر بریت کی درخواست پر آئندہ دلائل دیں گے۔

احتساب عدالت نے کیس سماعت 27 جنوری تک ملتوی کر دی۔