پی ڈی ایم اے خیبر پختونخوا نے گزشتہ 24 گھنٹوں میں بارشوں اور برفباری سے مختلف حادثات کی رپورٹ جاری کر دی ہے۔

پی ڈی ایم اے رپورٹ کے مطابق مختلف حادثات میں 6 افرادجاں بحق جبکہ 13 افراد زخمی ہوئے، 8 گھروں کوجزوی  نقصان پہنچا، چارسدہ اور دیراپر میں بارش اور برفباری سے متاثرہ خاندانوں میں امدادی سامان تقسیم کر دیا گیا۔

رپورٹ میں بتایا گیا کہ وزیر اعلیٰ خیبر پختونخوا کی ہدایت پر متعلقہ ضلعی انتظامیہ کی امدادی کارروائیاں جاری ہیں، ضلعی انتظامیہ اور متعلقہ ادارے بند سڑکوں کو بحال کرنے کے لیے اقدامات کر رہی ہیں، گلیات میں گاڑیوں کا داخلہ مکمل طور پر بند کر دیا گیا ہے۔

پی ڈی ایم اے کے مطابق گلیات میں سیاحوں سے متعلق کوئی ناخوشگوار واقعہ رونما نہیں ہوا، گاڑیوں میں موجود سیاحوں کو ہوٹلوں اور قیام گاہوں میں منتقل کردیا گیا ہے، مری سے گلیات میں داخل ہونے والے سیاحوں کو روک دیا گیا۔

ڈی جی پی ڈی ایم اے کا کہنا ہے کہ پی ڈی ایم اے تمام اضلاع کے ساتھ قریبی رابطے میں ہے، وزیر اعلیٰ خیبرپختونخوا کی ہدایت پر متعلقہ محکمے الرٹ ہیں، ضلعی انتظامیہ ریسکیو 1122 اور جی ڈی اے کے اہلکار بھاری مشینری کے ساتھ فلیڈ میں موجود ہیں۔

ڈی جی پی ڈی ایم اے نے بتایا کہ پی ڈی ایم اے نے یکم جنوری کو تمام اضلاع کو مراسلہ کیا تھا جس میں بارشوں اور برفباری کی پیش گوئی اور پیشگی حفاظتی اقدامات کی ہدایات جاری کی تھی، پی ڈی ایم اے کا کنٹرول روم 24 /7 فعال ہے اور کسی بھی ناخوشگوار واقعے کی اطلاع ہمیں ہماری ہیلپ لائن 1700 پر دیں۔