وزیر خارجہ نے کہا ہے کہ حکومت پاکستان سیاحوں کی سہولت کیلئے ای ویزہ کے اجراء سمیت متعدد اقدامات اٹھا رہی ہے۔

وزیر خارجہ مخدوم شاہ محمود قریشی نے میڈرڈ میں یو این ورلڈ ٹورازم ھیڈکوارٹر کا دورہ کیا جہاں انہوں نے یو این ورلڈ ٹورازم آرگنائزیشن کے سیکرٹری جنرل سے ملاقات کی۔

اس موقع پر یو این ڈبلیو ٹی او کے سیکرٹری جنرل زوراب پولولیکا شویلی نے وزیر خارجہ مخدوم شاہ محمود قریشی کا خیر مقدم کیا، اسپین میں پاکستان کے سفیر شجاعت راٹھور بھی وزیر خارجہ کے ہمراہ تھے۔

دوران ملاقات وزیر خارجہ نے سیکرٹری جنرل “زوراب پولولیکا شویلی”کو آئندہ چار سالہ مدت، (2022 تا 2025) کے لیے سیکریٹری جنرل کے عہدے پر، دوبارہ منتخب ہونے پر مبارکباد دی جبکہ وزیر خارجہ نے سیاحت کے فروغ اور ورثے کے تحفظ کے ضمن میں یو این ڈبلیو ٹی او کے مؤثر کردار کو بھی سراہا۔

 وزیر خارجہ نے پاکستان میں سیاحت کے شعبے کی ڈیجیٹائزیشن اور تکنیکی معاونت کیلئے یو این ڈبلیو ٹی او ٹیم کی مہارت سے استفادہ حاصل کرنے کی توقع کا اظہار کیا جبکہ وزیر خارجہ نے سیکرٹری جنرل یو این ورلڈ ٹورازم آرگنائزیشن کو ماحولیاتی انحطاط سے نمٹنے اور فطرت سے محبت کرنے والوں کے لیے سیاحتی مقامات کو محفوظ بنانے کے لیے وزیر اعظم کے 10 بلین سونامی ٹری منصوبے کی تفصیلات سے آگاہ کیا۔

ملاقات میں وزیر خارجہ مخدوم شاہ محمود قریشی نے کہا کہ ریتلے ساحلوں سے لیکر پرشکوہ پہاڑوں تک پاکستان میں بہت سے سیاحتی مقامات موجود ہیں، وزیر اعظم عمران خان کے وژن کی روشنی میں حکومت پاکستان سیاحت کے فروغ کے حوالے سے دس سالہ روڈ میپ پر عمل پیرا ہے۔

انہوں نے کہا کہ حکومت پاکستان سیاحوں کی سہولت کیلئے ای ویزہ کے اجراء سمیت متعدد اقدامات اٹھا رہی ہے، پاکستان میں سیکورٹی کی صورتحال میں بہتری کو پیش نظر رکھتے ہوئے بہت سے ممالک نے اپنی ٹریول ایڈوائزری پر نظر ثانی کی ہے۔

وزیر خارجہ مخدوم شاہ محمود قریشی کا مزید کہان تھا کہ حکومت پاکستان قدرتی، سماجی، ثقافتی و ماحولیاتی ورثے کے تحفظ کو یقینی بناتے ہوئے پائیدار ترقی کے ساتھ ساتھ سیاحت کے فروغ کیلئے کاوشیں بروئے کار لا رہی ہے۔

اس موقع پر سیکرٹری جنرل یو این، ڈبلیو ٹی او نے کہا کہ پاکستان میں بہت سے مقامات ایسے ہیں جو سیاحوں کی توجہ کا مرکز ہیں – بڑے پیمانے پر کرونا ویکسینیشن کے بعد سیاحوں کی نقل و حرکت میں بہتری متوقع ہے۔

سیکرٹری جنرل یو این ڈبلیو ٹی او نے سیاحت کے فروغ کیلئے حکومت پاکستان کی جانب سے اٹھائے گئے اقدامات کو سراہتے ہوئے سیاحت کے فروغ کیلئے بھرپور معاونت کی فراہمی کا یقین دلایا۔