عدالت نے دورانِ سماعت ریمارکس دیے کہ دیکھنا ہوگا کہ حکومت زمینیں آنکھیں کھول کر دے رہی ہے یا بند کرکے؟ 

ماڑی پور میں دو ایکٹر اراضی صنعتی مقاصد کے لیے دینے کے کیس میں سندھ ہائی کورٹ نے صوبائی حکومت سے پالیسی طلب کرلی۔

دورانِ سماعت عدالت نے ریمارکس دیے کہ بتایا جائے، صنعتی پلاٹس الاٹ کرنے سے متعلق کیا پالیسی ہے؟ ماڑی پورمیں کون سی انڈسٹری لگائی جا رہی ہے؟ دیکھنا ہوگا وہاں صنعت لگ بھی سکتی ہے یا نہیں؟

عدالت نے اپنے ریمارکس میں کہا کہ انتہائی قیمتی اراضی صنعتی مقاصد کے نام پر الاٹ کی جاتی ہے۔ پھر صنعتی اراضی پر رہائشی اور کمرشل میں تبدیل کر دیا جاتا ہے۔

جسٹس سید حسن اظہر رضوی نے کہا کہ اسی اراضی پر پھر فلیٹس کھڑے کیے جاتے ہیں۔ قومی خزانے کو اس عمل سے کیا فائدہ پہنچایا جا رہا ہے۔

جسٹس سید حسن اظہر رضوی نے ریمارکس دیے کہ شہراب ٹول پلازہ تک جا چکا۔ اسٹیٹ کو کیا فائدہ پہنچایا جا رہا ہے؟ درخواست گزار حاجی معصم آئندہ سماعت پرعدالت کو مطمئن کرے اوربتایا جائے، صنعتی شعبے میں ان کی کیا خدمات ہیں؟

دوسری جانب سندھ ہائی کورٹ میں پرانی سبزی سے نئی سبزی منڈی میں دوکان الاٹ نہ کرنے سے متعلق کیس کی بھی سماعت ہوئی۔

 عدالت نے چیئرمین ایڈمنسٹریٹر کراچی مارکیٹ کمیٹی علی احمد جوکھیو کو توہینِ عدالت کا نوٹس جاری کرتے ہوئے آئندہ سماعت پر پیش ہونے کا حکم دے دیا۔

معروف اورنگزیب نے عدالت کو بتایا  کہ عدالتی حکم کے باوجود کئی برسوں سے دوکان الاٹ نہیں کی جا رہی۔

چوہدری محمد اقبال ایڈووکیٹ نے عدالت کو بتایا کہ 1992 میں دکان نئی سبزی منڈی میں الاٹ کرنے کی درخواست دی تھی جس میں مؤقف اختیارکیا گیا کہ دو ہزارسترہ تک دوسروں کو دکانیں الاٹ کی گئیں۔ عدالتی احکامات کے باجود دکان الاٹ نہیں کی جا رہی۔