بھارت کی معروف سیاحتی ساحلی ریاست گوا میں کورونا کے نئے کیسز میں اضافے نے حکام کو تشویش میں مبتلا کر دیا ہے۔

گوا کی مقامی حکومت نے کورونا وائرس کے پھیلاؤ کے باعث 26 جنوری تک اسکول اور کالج بند کرنے کا اعلان کر دیا ہے۔

وزیراعلیٰ پرمود ساونت نے آج کورونا ٹاسک فورس اجلاس کی صدارت کی۔ اجلاس کے بعد میڈیا سے بات چیت کرتے ہوئے اُنہوں نے بتایا کہ گوا حکومت ریاست میں رات کا کرفیو بھی نافذ کرے گی۔

گوا میں اتوار تک کورونا سے متاثرہ کیسز کی شرح 10.7 فیصد رپورٹ کی گئی ہے۔

کورونا ٹاسک فورس کے رکن شیکھر سالکر نے میڈیا کو بتایا کہ کل سے 26 جنوری 2022ء تک اسکولوں میں آٹھویں اور نویں کلاس بند کر دی گئی ہے جبکہ گیارھویں اور بارہویں کلاس کے طلبا کورونا ویکسین لگوائیں اور 26 جنوری تک کلاسز اٹینڈ نہ کریں۔

کورونا ٹاسک فورس کے رکن نے یہ بھی کہا کہ کل یا پرسوں رات 11 سے صبح 6 بجے تک کرفیو کے نفاذ کا حکم بھی جاری کر دیا جائے گا۔ ریاستی حکومت اندرونِ خانہ سرگرمیوں پر بھی پابندی لگائے گی۔

کورونا ٹاسک فورس کے رکن شیکھر سالکر کا کہنا تھا کہ اگرچہ ریاست میں کورونا کیسز میں اضافہ ہوا ہے تاہم اموات اور ہسپتالوں میں داخلے کی شرح کم ہے۔

گزشتہ اتوار کو سرکاری اعداد و شمار کے مطابق گوا میں 388 نئے کورونا کیسز رپورٹ ہوئے تھے جس کے بعد ریاست میں کیسز کی کل تعداد 1 لاکھ 81 ہزار 5 سو 70 ہوگئی تھی جبکہ ایک موت واقع ہونے سے اموات کی کل تعداد 3 ہزار 5 سو 23 ہوچکی ہے۔