اپوزیشن لیڈر یوسف رضا گیلانی نے کہا ہے کہ مری واقعے پر صرف کمیٹی بنا دینا کافی نہیں

تفصیلات کے مطابق سینیٹ اجلاس میں یوسف رضا گیلانی نے سانحہ مری پر اظہارِ خیال کرتے ہوئے کہا کہ اگر انتظامیہ بروقت اقدامات کرتی تو انسانی جانوں کا بچایا جاسکتا تھا، پانچ دن گزرنے کے باوجود دیہی علاقوں میں ریلیف کا کام شروع نہ ہوسکا۔

انہوں نے کہا کہ ہم الزام تراشی نہیں کرتے لیکن یہ ذمے داری حکومت کی تھی، واقعے پر صرف کمیٹی بنا دینا کافی نہیں، مری کے لوگ چاہتے ہیں اس واقعے کی باضابطہ انکوائری ہو۔

یوسف رضا گیلانی کا کہنا تھا کہ اس معاملے کی جوڈیشل انکوائری کی جائے تاکہ ذمے داران کا تعین ہوسکے، جس نے کوتاہی کی ان کو کٹہرے میں لانے کے بعد سزا دی جائے۔

اپوزیشن لیڈر یوسف رضا گیلانی نے مزید کہا کہ جن لوکل لوگوں نے مدد کی ان کا شکریہ ادا کرتے ہیں، حکومت صرف یہی کہتی رہی کہ ہم نے مری کی سیاحت کو فروغ دیا۔

واضح رہے کہ مری میں چند روز قبل برف کا طوفان آیا تھا، جس میں ہزاروں گاڑیاں پھنس گئی تھیں، برفباری کے باعث مختلف گاڑیوں میں 24 افراد دم گھٹ کر جاں بحق ہوگئے تھے۔

شدید برفباری میں ٹریفک جام ہونے کے بعد بڑی تعداد اپنی گاڑیوں میں ہی محصور ہوکر رہ گئی تھی۔ ان ہی میں وہ بدقسمت افراد بھی شامل تھے جو اپنی گاڑیوں میں دم گھٹنے سے زندگی کی بازی ہار گئے۔