عدالت نے غیرقانونی تعمیرات کے خلاف کارروائی جاری رکھنے اور بلڈر کے خلاف مقدمہ درج کرنے کا حکم دے دیا۔ 

تفصیلات کے مطابق سندھ ہائیکورٹ میں ضلع وسطی میں اجازت کے بغیرچھ منزلہ عمارت کی تعمیر کے خلاف درخواست کی سماعت ہوئی۔

سندھ ہائی کورٹ نے غیر قانونی تعمیرات کے خلاف کارروائی جاری رکھنے کا حکم دے دیا۔

عدالت نےغیر قانونی تعمیرات میں ملوث بلڈر کے خلاف مقدمہ درج کرنے کا حکم دے دیا۔

دورانِ سماعت عدالت نے حکم دیا کہ بلڈنگ کی تعمیر کے دوران علاقے میں تعینات ایس بی سی اے کے افسران کے خلاف بھی مقدمہ درج کرایا جائے۔

سندھ ہائی کورٹ نے سندھ بلڈنگ کنٹرول اتھارٹی کو دو ماہ میں غیر قانونی تعمیرات ختم کرانے کا حکم دیا۔

عدالت نے آئندہ سماعت پر ایس بی سی اے سے رپورٹ بھی طلب کرلی۔

درخواست گزار کے وکیل نے عدالت سے کہا کہ ایس بی سی اے نے اپنی رپورٹ میں انکشاف کیا تھا کہ گراؤنڈ پلس چھ منزلہ عمارت کی تعمیر بغیر اجازت  کے تعمیر کی جا رہی ہے۔

تین ہفتوں میں جواب طلب

سندھ ہائیکورٹ میں ایک اور کیس میں خالد بن ولید روڈ پر واقع دانش گریویٹی ٹاور کے خلاف درخواست کی بھی سماعت ہوئی۔

عدالت نے ایس بی سی اے کو نوٹس جاری کرتے ہوئے تین ہفتوں میں جواب طلب کرتے ہوئے ایس بی سی اے کوعمارت کا نقشہ اور دیگر تفصیلات پیش کرنے کا حکم دے دیا۔

درخواست گزار جاوید نے عدالت کو بتایا کہ روڈ کے ساتھ ساتھ پارک پر بھی قبضہ کر کے دس منزل سے زائد عمارت تعمیر کر لی گئی ہے۔

عدالت نے ریمارکس دیے کہ عمارت پچیس سال پہلے مکمل تعمیر ہوگئی تھی۔

دورانِ سماعت جسٹس حسن رضوی نے وکیل سے مکالمہ کرتے ہوئے کہا کہ آپ اب عدالت آرہے ہیں؟

درخواست گزار کا مؤقف تھا کہ بنیادی حقوق کی خلاف ورزی ہے، پراجیکٹ دس فیصد بھی آباد نہیں ہوا۔