کراچی میں دعا منگی کیس کا مرکزی ملزم طارق روڈ پر شاپنگ کرتے ہوئے شاپنگ مال سے فرار ہوگیا ہے۔

تفصیلات کے مطابق ملزم کے فرار ہونے کی سی سی ٹی وی ویڈیو بول نیوز نے حاصل کرلی ہے جس میں ملزم کو شاپنگ مال سے باہر جاتے دیکھا جاسکتا ہے۔

سی سی ٹی وی فوٹیج میں ملزم کے ہاتھ میں شاپنگ بیگز بھی دیکھے جاسکتے ہیں جبکہ ملزم کے ساتھ کوئی پولیس اہلکار موجود نہیں ہے۔

جیل سے کورٹ لے جائے جانے کے دوران یہ واقعہ اس وقت پیش آیا جب کورٹ پولیس اہلکار ذوہیب قریشی کو شاپنگ کرانے لے گئے اور کورٹ پولیس اہلکاروں نے جان بوجھ کر کسی کو اطلاع نہ دی۔

ذرائع کا کہنا تھا کہ جیل پہنچنے پر جب قیدیوں کی گنتی ہوئی تو عقدہ کھلا کہ ذوہیب قریشی فرار ہوگیا ہے۔

ذرائع نے بتایا کہ ملزمان کیخلاف اینٹی منی لانڈرنگ کے مقدمات بھی درج تھا، دعا منگی اور بسمہ کے اغوا میں ملوث ملزمان گرفتار کئے گئے جبکہ دو پولیس اہلکاروں کو حراست میں لے کر فیروزآباد تھانے میں مقدمہ درج کیا جارہا ہے۔

واضح رہے کہ دعا منگی کو 30 نومبر 2019 کو ڈیفینس سے اغوا کیا گیا تھا اور اس کی رہائی 20 سے 25 لاکھ روپے تاوان کی ادائیگی کے بعد عمل میں آئی تھی۔

اس ہائی پروفائل کیس کے ملزمان کو کراچی پولیس کی خصوصی ٹیم نے 18 مارچ کو گرفتار کیا تھا۔

تفتیش میں یہ بات سامنے آئی تھی کہ انھی ملزمان نے ڈیفنس سے تاوان کے لیے بسمہ سلیم نامی لڑکی کو بھی اغوا کیا تھا اور اسکو بھی تاوان کی ادائیگی کے بعد رہا کیا تھا، دونوں مقدمات انسداد دہشتگردی کی عدالت میں زیر سماعت ہیں۔