امریکی نژاد خاتون وجیہ سواتی قتل کیس میں عدالت نے ملزمان کا چار روز کا ریمانڈ منظورکر لیا۔

تفصیلات کے مطابق راولپنڈی میں امریکی نژاد خاتون وجیہ سواتی قتل کیس کی سماعت ہوئی جس میں ملزمان کو سول جج  ڈیوٹی جج طلعت وحید کی عدالت میں پیش کیا گیا۔

مرکزی ملزم رضوان، والد حیرت اللہ اوران کا ملازم سلطان رشید بھی عدالت میں پیش ہوا۔

وقوعہ کی جگہ دھونے والی خاتون ملازمہ زاہدہ یوسف، ملازم زید یوسف اور ملازم یوسف مسیح  بھی عدالت میں پیش ہوئے۔

پولیس نے عدالت سے استدعا کی کہ ملزمان سے گاڑی سمیت مزید چیزیں برآمد کرنی ہیں ریمانڈ میں توسیع کی جائے جس پر عدالت نے ملزمان کا مزید چار روزہ ریمانڈ منظورکرتے ہوئے ملزمان کو پولیس کی تحویل میں دے دیا۔

سول جج  ڈیوٹی جج طلعت وحید نے کیس کی سماعت چارجنوری تک ملتوی کردی۔

ملزمان کو سخت سیکیورٹی میں عدالت میں پیش کیا گیا۔

ڈی این اے سیمپل فرانزک لیب میں جمع

اس سے قبل پولیس نے مقتولہ کی شناخت کے لئے لاش سے حاصل کیے گئے ڈی این اے سیمپل بھی فرانزک لیب جمع کروا دیے۔ لاش کے نمونوں کی میچنگ مقتولہ کی ایک بہن کے ڈی این اے نمونوں سے کی جائے گی۔

پولیس ذرائع کے مطابق ڈی این اے رپورٹ جلد حاصل کرنے کے لئے پنجاب فرانزک سائنس لیبارٹری کے حکام سے سفارش کے ساتھ ساتھ  ڈی این اے رپورٹ ایک ہفتہ میں فراہم کرنے کی بھی سفارش کی گئی۔

پولیس ذرائع کا کہناتھا  کہ معاملے میں امریکی سفارت خانہ کے دباؤ کے پیش نظر ڈی این اے رپورٹ جلد حاصل کی جا رہی ہے۔ کیس کی نوعیت حساس ہونے کے باعث ڈی این اے رپورٹ جلد فراہم کرنے کی درخواست کی گئی ہے۔ معمول کے مطابق ڈی این اے رپورٹ ایک ماہ کے بعد فراہم کی جاتی ہے۔

پولیس کے مطابق ڈی این اے رپورٹ ملنے پرلاش کو امریکا منتقل کرنے کا حتمی فیصلہ کیا جائے گا۔