مری میں سیاحوں کے داخلے پر پابندی ختم ہونے کے بعد سیاحوں کی آمد سے رونقیں بحال ہونا شروع ہوگئی۔

 پہلے روز سیاحوں کی کم تعداد مری میں سیاحت کے لئے آئی ہے ۔

ذرائع کے مطابق مری کے انٹری پوائینٹس ، سترہ میل ٹول پلازہ ، ایکسپریس وے پھلگراں ٹول پلازہ ، لوہرٹوپہ،  باڑ ہاں ، اپر جھکاگلی روڈ پر پنجاب پولیس ، سٹی ٹریفک پولیس اور موٹروے پولیس کے افسران و اہلکار موجود ہیں۔

مری میں ان انٹری پوائینٹ پر گاڑیوں کی چیکنگ کا عمل جاری ہےجبکہ مین انٹری پوائینٹ سے سیاحوں کی گاڑیوں کا  ان آوٹ  کا ریکارڈ بھی بنایا جارہا ہے ۔

کمشنر راولپنڈی نے مری میں سیاحوں کے داخلے سے متعلق شرائط واضح کردی ہیں اور اس حوالے سے نوٹی فکیشن بھی جاری کردیا ہے۔

ضلعی انتظامیہ کی جانب سے جاری کردہ نوٹی فکیشن کے مطابق مری میں اب سے روزانہ صرف 8 ہزار گاڑیوں کو داخلے کی اجازت ہوگی

اس کے علاوہ مری میں شام 5 بجے سے صبح 5 بجے تک سیاحوں کے داخلے پر پابندی ہو گی۔

نوٹی فکیشن کے مطابق مری اور آزاد کشمیر کے رہائشیوں کی گاڑیوں کے داخلے پر پابندی نہیں ہوگی، چیف ٹریفک آفیسر راولپنڈی مری ٹریفک پلان ترتیب دیں گے۔

نوٹی فکیشن کے مطابق حد سے زائد گاڑیوں کو روکنے کی ذمے داری بھی چیف ٹریفک آفیسر کی ہوگی۔

نوٹی فکیشن میں یہ بھی کہا گیا ہےکہ چیف ٹریفک آفیسر محکمہ موسمیات سے مکمل رابطے میں رہیں گے۔

اس کے علاوہ مری میں چیف ٹریفک آفیسر، سٹی پولیس آفیسر مناسب نفری تعینات کرنے کے پابند ہوں گے