اسلام آباد پولیس کا مری سے واپس آنے والے سیاحوں کے محفوظ انخلاء کا سلسلہ جاری ہے۔

ترجمان اسلام آباد پولیس کے مطابق اب تک ہزاروں عورتوں، بچوں اور شہریوں کو محفوظ مقام تک پہنچایا جا چکا ہے، اسلام آباد پولیس کے سینئر افسران بھاری نفری کے ہمراہ انخلاء آپریشن میں حصہ لے رہے ہیں۔

ترجمان اسلام آباد پولیس کا کہنا ہے کہ آئی جی اسلام آباد محمد احسن یونس تمام آپریشن کو خود مانیٹر کر رہے ہیں، اسلام آباد پولیس اپنے تمام تر وسائل کو بروئے کار لاتے ہوئے شہریوں کی مدد کیلئے کوشاں ہے۔

ترجمان اسلام آباد پولیس نے کہا کہ شہریوں سے گزارش ہے کہ پولیس اور انتظامیہ کے ساتھ تعاون کریں۔

واضح رہے کہ مری میں گزشتہ روز برف کا طوفان آیا تھا، جس میں ہزاروں گاڑیاں پھنس گئی تھیں۔

مری میں اس وقت ایمرجنسی رضاکاروں اور امدادی کارکنوں کے علاوہ کسی کے بھی داخلے پر پابندی ہے۔پاک فوج کے دستے انتظامیہ کے ساتھ کر امدادی کاموں میں مصروف ہیں۔

اس کے علاوہ وزیر اعظم عمران خان نے سانحہ مری پر انکوئری کا حکم دے دیا ہے۔

دوسری جانب پاک فوج کے ترجمان کا کہنا ہے کہ ایف ڈبلیو او نے مری ایکسپریس وے ٹریفک کے لیے کھول دی ہے ، پاک فوج نے پھنسے ہوئے سیاحوں کے لیے مری میں 4ریلیف کیمپس قائم کردیے ہیں ، ریلیف کیمپس ملٹری کالج مری،جھیکا گلی،اے پی ایس کلڈنہ، اسٹیشن سپلائی ڈپو سنی بینک میں قائم کیے ہیں۔

آئی ایس پی آر کا کہنا ہے کہ سول انتظامیہ سے تعاون کے لیے تمام وسائل بروئے کار لائے جا رہے ہیں ، پاک فوج کے انجینیئرز اور مشینری مری ڈویژن انتظامیہ کی مدد کر رہی ہے۔