حسان خاور نے کہا ہے کہ روڈا کا منصوبہ ملک و قوم کے روشن مستقبل کیلئے سنگ میل کی حیثیت رکھتا ہے۔

معاون خصوصی وزیر اعلیٰ پنجاب و ترجمان پنجاب حکومت حسان خاور نے روڈا کے حوالے سے عدالتی فیصلے کی روشنی میں اپنے ایک بیان میں کہا کہ راوی اربن ڈویلپمنٹ اتھارٹی کے حوالے سے لاہور ہائیکورٹ کے فیصلے کو قانونی ٹیم دیکھ رہی ہے۔

انہوں نے کہا کہ عدالتی فیصلے کا بغور جائزہ لیا جارہا ہے، پنجاب حکومت عدالتی فیصلے کے حوالے سے تمام قانونی آپشنز پر غور کر رہی ہے۔

حسان خاور کا کہنا تھا کہ میڈیا کے کچھ حصے روڈا کے حوالے سے عدالتی فیصلے کو غلط رنگ دے رہے ہیں، روڈا کی کچھ شقوں کے حوالے سے عدالت نے احکامات دیئے ہیں۔

معاون خصوصی وزیر اعلیٰ پنجاب نے کہا کہ روڈا کا منصوبہ ملک و قوم کے روشن مستقبل کیلئے سنگ میل کی حیثیت رکھتا ہے، روڈا اپنا کام جاری رکھے گی اور عدالتی احکامات پر عملدرآمد کیا جائے گا۔

ترجمان پنجاب حکومت کا کہنا تھا کہ وزیراعظم عمران خان کے وژن اور وزیراعلی عثمان بزدار کی ہدایت پر نئے شہر بسائے جا رہے ہیں، بڑے شہروں میں آبادی کی روک تھام ,ماحولیاتی آلودگی کے خاتمے اور بہتر سہولیات کی فراہمی کیلئے روڈا جیسے منصوبے نہایت ضروری ہیں۔

معاون خصوصی وزیر اعلیٰ پنجاب و ترجمان پنجاب حکومت حسان خاور کا مزید کہنا تھا کہ چاہار باغ پر ترقیاتی کام زور و شور سے جاری ہیں جبکہ روڈا کے دیگر امور بھی تیزی سے نمٹائے جا رہے ہیں۔ ملک اور قوم کی تقدیر بدلنے والے روڈا منصوبے کو جلد پایہ تکمیل تک پہنچا رہے ہیں۔