پنجاب میں سرکاری نوکریوں کے نام پر بڑے پیمانے پر مبینہ فراڈ کا انکشاف ہوا ہے۔

گورنمنٹ گرلز ہائی اسکول کی سینئر ہیڈ مسٹریس کلثوم حناء بزدار نے وزیراعلیٰ پنجاب سردار عثمان بزدار کے قریبی ساتھیوں اور رشتہ داروں پر الزامات عائد کیے ہیں۔

کلثوم حناء بزدار نے کہا کہ سرکاری نوکریوں کے نام پر وزیراعلیٰ کے رشتہ داروں اور قریبی افراد نے 13کروڑ 34لاکھ روپے مجھ سے لیے، سرکاری نوکریوں کی بجائے لوگوں کو جعلی آرڈرز تھما دیے۔

انہوں نے کہا کہ وزیراعلیٰ کے قریبی لوگ حراساں اور قتل واغواء کی دھمکیاں دے رہے ہیں، دھونس اور دھمکیوں کی وجہ سے شدید قرب میں مبتلا ہوں۔

کلثوم حناء بزدار نے کہا کہ قیوم بزدار، صلاح الدین بزدار اور نیاز بزدار نے مجھ سے رقم لی، مذکورہ افراد نے پیسے لے کر جعلی آرڈرز دیے۔

مبینہ فراڈ کا معاملہ سامنے آنے پر متاثرہ شہری کی درخواست پر کلثوم حناء بزدار کیخلاف سٹی تونسہ میں مقدمہ درج کردیا گیا۔

ذرائع کے مطابق کلثوم حناء بزدار کی مبینہ طور پر کروڑوں کی جائیداد کا انکشاف بھی ہوا ہے، خاتون ٹیچر کے  ملتان ڈی ایچ اے میں دو کینال پلاٹ جبکہ بچ ولاز میں کوٹھی کی مالکہ بھی ہے۔

خاتون کے زیراستعمال دو گاڑیوں کی مالیت 48 لاکھ  ہے، سینئر ہیڈ مسٹریس کے نام تحصیل تونسہ کے موضع چھجڑی میں 50 کینال قیمتی رقبہ اور ڈی جی خان تونسہ میں بھی پلاٹس ہیں۔