واٹس ایپ پیغام رسانی کے لئے دنیا کی سب سے زیادہ استعمال کی جانے والی ایپلیکیشن ہے، واٹس ایپ پر ایک فراڈ سامنے آیا ہے جس میں سوشل میڈیا صارفین کے بینک اکاؤنٹس کی معلومات حاصل کرکے انہیں لوٹا جا رہا ہے۔

اس فراڈ کو ریڈف ڈاٹ کام کا نام دیا گیا ہے جس میں صارفین کو سال نو کی مبارکباد کے ساتھ انہیں پرکشش اور قیمتی تحائف مفت دینے کا لالچ دیا جاتا ہے اور جب پیغام میں دئیے گئے لنک پر کلک کیا جاتا ہے تو ایک نیا صفحہ کھلتا ہے۔

اس کے بعد صارفین کے سامنے ایک سروے فارم آتا ہے جس کو پر کرنے کے لئے کہا جاتا ہے پھر اس کی معلومات جیسے کہ نام، والدین کے نام، تاریخ پیدائش، ذاتی رہائش کا پتہ، بینک اکاؤنٹس کی تفصیل حاصل کی جاتی ہے۔

فراڈئیے صارف کی معلومات حاصل کرتے ہی حرکت میں آجاتے ہیں اور آپ کی ذاتی معلومات کا غیرقانونی استعمال کرتے ہوئے نہ صرف آپ کی ڈیوائس پر غیر ضروری اور نقصان دہ ایپلیکیشن انسٹال کر دیتے ہیں بلکہ آپ کو پتہ چلنے سے پہلے ہی آپ کا بینک اکاؤنٹ بھی خالی ہوچکا ہوتا ہے۔

 فراڈیئے اس وائرس  کے ذریعے صارفین کے پرسنل کمپیوٹر کی ونڈوز ، آئی او ایس اور اینڈرائڈ فونز پر وٹس ایپ تک رسائی حاصل کر کے ذاتی معلومات، ڈیبٹ یا کریڈٹ کارڈ اور بینک اکاؤنٹس کی انفارمیشن حاصل کرلیتے ہیں۔

واضح رہے کہ ریڈف ڈاٹ کام کی طرف سے موصول ہونے والا کوئی بھی پیغام یا لنک کسی صورت نہ کھولا جائے اور اسے سپام تصور کرتے ہوئے فوری طور پر ڈیلیٹ کردیا جائے۔