پاک سرزمین پارٹی کے سربراہ مصطفی کمال نے کہا ہے کہ بڑے شہروں میں ملک دشمن طاقتوں کا سرگرم ہونا حکومتی کارکردگی پر سوالیہ نشان ہے۔

مصطفی کمال نے لاہور نیو انار کلی بازار میں بم دھماکے کی سخت ترین الفاظ میں مذمت کی ہے۔

مصطفی کمال نے دھماکے کے نتیجے میں 3 افراد کے جاں بحق اور متعدد افراد کے زخمی ہونے پر گہرے افسوس کا اظہار کرتے ہوئے کہا کہ بڑے شہروں میں ملک دشمن طاقتوں کا سرگرم ہونا حکومتی کارکردگی پر سوالیہ نشان ہے۔

انہوں نے کہا کہ حکومت پنجاب دھماکے میں زخمی ہونے والے افراد کو بہترین علاج معالجے کی سہولت فراہم کرئے۔

پاک سرزمین پارٹی کے سربراہ مصطفی کمال نے زخمی افراد کی جلد و مکمل صحت یابی کے لئے دعا کی۔

واضح رہے کہ لاہور کے علاقے نیو انار کلی پان منڈی میں دھماکا ہوا ہے جس میں 3 افراد جاں بحق جبکہ 20 زخمی ہوگئے ہیں۔

لاہور کے علاقے نیو انار کلی بازار کی پان منڈی میں عین اس وقت دھماکا ہوا جب لوگوں کی بڑی تعداد وہاں موجود تھی۔

دھماکا اس قدر شدید تھا کہ اس سے 6 موٹر سائیکلیں اور اردگرد کی دکانیں تباہ جبکہ گاڑیوں میں بھی آگ گئی۔

دھماکے کے زخمیوں کو فوری طور پر قریبی اسپتال منتقل کردیا گیا۔

طبی عملے نے 3 افراد کے جاں بحق ہونے کی تصدیق کردی ہے جب کہ 20  زخمیوں کو طبی امداد فراہم کی جارہی ہے۔

سیکیورٹی فورسز نے علاقے کو گھیرے میں لے کر سرچ آپریشن شروع کردیا ہے جب کہ پولیس کی خصوصی ٹیمیں شواہد اکٹھا کررہی ہیں۔

ڈی آئی جی آپریشنز کا کہنا ہے کہ ابتدائی شواہد سے ایسا لگتا ہے کہ دھماکے میں موٹرسائیکل استعمال کی گئی ہے۔