سپریم کورٹ نے ریلوے رائل پام گالف کلب کیس میں سیکریٹری ریلوے کو کلب کے ٹینڈرز کے لیے اشتہار جاری کرنے کاحکم دے دیا۔

سپریم کورٹ نے نجی آڈٹ فرم کو دو ہفتوں میں کلب کا 2017 کا آڈٹ مکمل کرنے کی ہدایت کردی۔

دورانِ سماعت نامزد چیف جسٹس آف پاکستان نے ریمارکس میں کہا کہ عوامی مفاد میں یہ مقدمہ عدالت کے پاس آیا کہ پبلک پراپرٹیز کا غلط استعمال ہورہا ہے۔ کیا کلب کے 2016 تک کے مالی معاملات میں خورد برد بے ضابطگیاں سامنے آئیں؟

حکام نجی کمپنی نے عدالت کو بتایا کہ کلب کے مالی معاملات کے لیے ہماری کمپنی ذمہ دار ہے۔

جسٹس اعجاز الاحسن نے کہا کہ کلب کے مالی معاملات پر آڈٹ رپورٹس کا الگ سماعت میں جائزہ لیں گے۔

سیکریٹری ریلوے نے کہا کہ کلب کےلیے اشتہاردینے کی تیاری مکمل کرلی ہے۔ دوہفتوں میں ٹینڈر کیلئے نیشنل انٹرنیشنل اشتہار دے دیا جائے گا۔

جسٹس اعجاز الااحسن نے ریمارکس میں کہا کہ سابق چیف ایگزیکٹیو شاہ رخ نے کلب میں بھرتیاں کیں۔ سابق سی ای او نے ممبر شپ اورمالی معاملات کے بھی فیصلے کیے۔ سابق سی ای او کے فیصلوں سے 96 ملین کی بے ضابطگیاں سامنے آئیں۔

اٹارنی جنرل نے عدالت کو بتایا کہ ریلوے نے آڈیٹر جنرل کو 96 ملین کی بے ضابطگیوں کا جواب دیدیا ہے۔ ریلوے کے جواب پر آڈیٹر جنرل نے آڈٹ پیراز پر حتمی رائے دینی ہے۔

نامزد چیف جسٹس عمرعطا بندیال کی سربراہی میں تین رکنی بینچ نے کیس کی سماعت کی۔