امریکی حکومت نے یوکرین کی بگڑتی ہوئی صورتحال کے پیش نظر اپنے سفارتی عملے کے اہل خانہ کو فوری طور پر ملک چھوڑنے کا حکم دے دیا ہے۔

امریکی اسٹیٹ ڈپارٹمنٹ کے مطابق یہ ہدایات تمام امریکی شہریوں کے لئے بھی ہے جو یوکرین میں موجود ہیں۔

اسٹیٹ ڈپارٹمنٹ نے اپنے ایک بیان میں کہا کہ روس یوکرین پر فوجی جارحیت کی تیاری کر رہا ہے ، ایسے میں ہم اپنے شہریوں کو تنہا نہیں چھوڑ سکتے۔

دوسری جانب روس نے امریکی بیان پر سخت ردعمل دیتے ہوئے کہا کہ امریکہ خطے میں کشیدگی کو ہوا دے رہا ہے۔

امریکہ کے اسٹیٹ ڈپارٹمنٹ نے اپنے شہریوں کو روس اور یوکرین کے سفر سے منع کر دیا ہے۔

امریکی اسٹیٹ ڈپارٹمنٹ کی سفری ایڈوائزری کے مطابق روس یوکرین پر حملے کی منصوبہ بندی کر رہا ہے۔

امریکی اسٹیٹ ڈپارٹمنٹ کے مطابق یوکرین میں امریکی سفارتخانہ کو بند نہیں کیا جا رہا ہے ، سفارتخانہ معمول کے مطابق کام کرتا رہے گا۔

اسٹیٹ ڈپارٹمنٹ کے مطابق روسی حملے کی صورت میں یوکرین سے امریکی شہریوں کے انخلاء میں مشکلات پیش آ سکتی ہیں اس لئے پیشگی اقدامات کئے جارہے ہیں۔

نیٹو کے ملٹری ڈیفینس کے ہیڈ نے خبردار کیا ہے کہ یورپ میں نیا تنازع کسی بھی وقت جنم لے سکتا ہے ، کیونکہ ایک لاکھ روسی افواج یوکرین کی سرحد کے قریب جمع ہے۔