محکمہ سیاحت نے تاریخی اور مذہبی مقامات کی سیر کے لیے نئے سیاحتی پروگرام کا آغاز کردیا ہے۔

محکمہ سیاحت کے تحت سیاحتی پروگرام کا پہلا گائیڈڈ ٹور سیاحوں کو کرتارپور اور ملتان بہاولپور کی سیر کروائے گا۔

پہلے مرحلہ میں افتتاحی ٹور میں ایک دن کرتارپور کی سیر کروائی جائے گئی جبکہ 3 روزہ ٹرپ میں ملتان بہاولپور اور دڈاور فورٹ کی سیر کروائی جائے گئی۔

گائیڈڈ ٹور ہر ہفتے مختلف شہروں میں سیاحتی مقامات کی سیر کروائے گا جبکہ پہلے ٹرپ میں سفری سہولیات، کھانا اور رہائش محکمہ سیاحت فراہم کرے گا۔

خیال رہے کہ افتتاحی تقریب کل منعقد ہوگی، گائیڈڈ ٹرپ کل قزافی اسٹیڈیم سے روانہ ہوگا۔

واضح رہے کہ وزیر اعلیٰ پنجاب سردار عثمان بزدار کی خصوصی ہدایت پر مری میں سیاحوں کی سہولت کے لئے انتظامیہ نے ایکشن لے لیا ہے۔

انتظامیہ نے سیاحوں کی شکایات پر متعدد ہوٹل سیل کردیئے ہیں اور کھانے پینے کی غیر معیاری اشیاء فروخت کرنے والے ہوٹلوں کے خلاف کارروائی کی گئی ہے۔

ہوٹل انتظامیہ کے خلاف مقدمے درج کر کے جرمانے کیے گئے اور پارکنگ فیس میں اوور چارجنگ پر بھی کارروائی کی گئی ہے۔

زائد پارکنگ وصول کرنے پر متعلقہ افراد کے خلاف ایف آئی آر بھی درج کرلی گئی ہے۔

اس کے علاوہ مال روڈ، جھیکا گلی، ویوفورتھ روڈ، جی پی او چوک، لوئر ٹوپا اور دیگر علاقوں میں انتظامیہ نے کارروائیاں کی ہیں۔

عثمان بزدار نے کہا کہ کھانے پینے کی معیاری اشیاء کی مقرر کردہ نرخوں پر فراہمی یقینی بنائی جائے اور غیر معیاری اشیاء فروخت کرنے والوں کے خلاف کریک ڈاؤن جاری رکھا جائے۔

انہوں نے مزید کہا کہ سیاحوں سے اوور چارجنگ کسی صورت برداشت نہیں، انتظامیہ اوور چارجنگ کی روک تھام کے لئے مزید موثر اقدامات اٹھائے۔