صدر مملکت ڈاکٹر عارف علوی نے کہا ہے کہ گلگت بلتستان کے نوجوانوں کو جدید آئی ٹی اسکلز فراہم کرنے کی ضرورت ہے۔

ڈاکٹر عارف علوی سے گلگت بلتستان یونیورسٹی اسکردو کے طلباء اور فیکلٹی کی ملاقات ہوئی جس میں صدر مملکت کا کہنا تھا کہ گلگت بلتستان کے نوجوانوں کو جدید آئی ٹی اسکلز فراہم کرنے کی ضرورت ہے۔

ان کا کہنا تھا کہ مارکیٹ اور صنعت کی بڑھتی ضروریات پورا کرنے کیلئے ہنر مند گریجویٹس کی تعداد بڑھانا ہوگی، طلباء، مقامی آبادی اور سیاحوں کی سہولت کیلئے گلگت بلتستان میں انٹرنیٹ کا معیار، رسائی بڑھانے کیلئے اقدامات کر رہے ہیں۔

انہوں نے کہا کہ جامعات مقامی نوجوانوں کی مہارت میں اضافے پر توجہ دیں، آن لائن تعلیم کا حجم بڑھا کر طلباء کو مارکیٹ ضروریات کے مطابق ہنر مند بنایا جا سکتا ہے۔

صدر مملکت کا کہنا تھا کہ جی بی میں سیاحت کے شعبے میں ترقی کی بے پناہ صلاحیت موجود ہے، حکومت جی بی کے لوگوں کی معاشی صحت بہتر بنانے کے لیے شعبہ سیاحت کی ترقی پر توجہ دے رہی ہے۔

ڈاکٹر عارف علوی نے کہا کہ چائنہ پاکستان اکنامک کوریڈور میں گلگت بلتستان کو مرکزی مقام حاصل ہے، پاک چین اقتصادی راہداری خطے میں سماجی و اقتصادی خوشحالی لانے میں نمایاں کردار ادا کرے گی۔

صدر مملکت ڈاکٹر عارف علوی کا مزید کہنا تھا کہ جی بی میں پھلوں کی پروسیسنگ ، پیکجنگ اور شعبہ معدنیات کو جدید بنیادوں پر ترقی دینا معاشی ترقی کے لیے ضروری ہے۔

یونیورسٹی آف بلتستان اسکردو کے وائس چانسلر پروفیسر ڈاکٹر محمد نعیم خان نے صدر مملکت ڈاکٹر عارف علوی کو تعلیم کے فروغ میں یونیورسٹی کے کردار سے آگاہ کیا۔

بریفنگ میں کہا گیا کہ اس وقت یونیورسٹی کے مختلف کیمپسز میں 3200 طلباء مختلف پروگراموں میں زیرِ تعلیم ہیں۔

صدر مملکت نے گلگت بلتستان کے طلباء کو اعلیٰ تعلیم کی فراہمی میں یونیورسٹی کے کردار اور کارکردگی کو سراہا۔