حیدرآباد میں حیسکو نے سندھ کے دوسرے بڑے بین الاقوامی کرکٹ اسٹیڈیم کی بجلی منقطع کردی ہے۔

تفصیلات کے مطابق نیاز اسٹیڈیم میں گزشتہ دس روز سے بجلی کی فراہمی معطل کی ہوئی ہے جس کے باعث پانی کا بحران نے جنم لے لیا ہے۔

کئی روز سے پانی نہ ملنے کے باعث گراؤنڈ میں لگی گھاس جلنے لگی جبکہ گراؤنڈ لیول اور گھاس کاٹنے والی الیکٹرک مشینز بھی بند ہیں اور اسٹاف کے استعمال کے لئے پانی بھی نایاب ہے۔

خیال رہے کہ بجلی کی فراہمی بند اور پانی نایاب ہونے سے اسٹیڈیم میں پریکٹس کا عمل بھی بند ہوگیا ہے۔

مینجر نیاز اسٹیڈیم حفیظ الرحمن نے کہا ہے کہ بجلی منقطع ہوئے دس روز ہوگئے ہیں، بجلی اور پانی نہ ہونے کے باعث مقامی کھلاڑی پریکٹس کے لئے نہیں آرہے۔

نیاز اسٹیڈیم کے مینجر کا کہنا ہے کہ 7 جنوری سے پی سی بی ونٹر کلب میچز کا انعقاد ہونا ہے اگر بجلی بحال نہ ہوئی تو پی سی بی کلب میچز کا انعقاد مشکل ہوجائے گا۔

اس ضمن میں ترجمان حیسکو کا کہنا ہے کہ نیاز اسٹیڈیم پر ایک کروڑ 43 لاکھ سے زائد کے واجبات ہیں جس پر متعلقہ انتظامیہ کو متعدد بار لکھ چکے ہیں۔

ترجمان حیسکو نے مزید کہا کہ واجبات کی ادائیگی سندھ حکومت کی ذمہ داری ہے اور یقین دہانی کے باوجود واجبات کی ادائیگی نہیں کی جارہی۔