امریکا میں پاکستان کے سفیر اسد مجید کی سیکریٹری خارجہ سہیل محمود کے ہمراہ وزیراعظم عمران خان سے ملاقات کی ہے۔

ملاقات میں پاکستان کے امریکہ کے ساتھ سفارتی تعلقات سے متعلق امور پر تبادلہ خیال کیا گیا۔

اس موقع پر وزیراعظم عمران خان نے دوطرفہ تعلقات کی بہتری کے لیے کاوشیں تیز کرنے کی ہدایت کی۔

دوسری جانب وزیراعظم عمران خان کی زیرِ صدارت بلوچستان میں ترقیاتی منصوبوں پر پیش رفت کا جائزہ لینے کے لیے اجلاس ہوا، جس میں گورننس اسٹرکچر میں بہتری، حکومتی منصوبے، فشریز سیکٹر، کمانڈ ایریا ڈویلپمنٹ، ایگریکلچر سیکٹر اور نرسنگ کالجز کے قیام کے حوالے سے ایک جائزہ پیش کیا گیا۔

 وزیراعظم عمران خان نے کہا کہ بلوچستان کے عوام کی بہتری حکومت کی اولین ترجیحات میں شامل ہے، حکومت نے منصوبوں کو بلوچستان کے عوام کی زندگی پر اثرات کے مطابق ترجیح دی ہے۔

عمران خان کا کہنا تھا کہ بنیادی ڈھانچے کی ترقی، زراعت میں ترقی، ماہی پروری، پاور سیکٹر اور بنیادی سہولیات بشمول احساس پروگرام پر سبسڈی بتدریج رفتار پکڑ رہی ہے۔

وزیراعظم عمران خان کا مزید کہنا تھا کہ مقامی لوگوں کی معاشی ترقی کے لیے صنعت کاری اور پروسیسنگ پلانٹس کے قیام کو تیز کیا جا رہا ہے، اور غیر قانونی ٹرالنگ کی سرگرمیوں کو روک کر مقامی ماہی گیروں کے تحفظ کو یقینی بنایا جا رہا ہے۔