بھارتی حکومت کی طرف سے پی آئی اے کو خصوصی پرواز کی اجازت نہ دینے کے باوجود بھارتی یاتری پاکستان پہنچ گئے۔

بھارتی حکومت کی طرف سے پی آئی اے کو خصوصی پرواز کی اجازت نہ دینے کے باوجود ہندو یاتریوں کو پاکستان پہنچا دیا گیا ہے۔

ترجمان پی آئی اے کا کہنا ہے کہ 161 بھارتی ہندو یاتریوں کا وفد دہلی سے واہگہ کے راستے لاہور پہنچ گیا۔

پی آئی اے کے سی ای او ارشد ملک کی جانب سے ڈسٹرکٹ منیجر لاہور عبدالمقدم خان نے واہگہ پر یاتریوں کا استقبال کیا۔

متعلقہ خبر: بھارت کا پی آئی اے کو خصوصی پرواز کو اجازت دینے سے انکار

واہگہ سے پاکستان ہندو کونسل کے سرپرست ایم این اے رمیش کمار نے یاتریوں کی قیادت کی، ہندو یاتریوں کو لاہور سے خصوصی پرواز کے ذریعے پشاور روانہ کردیا گیا۔

یاتریوں نے پی آئی اے کی خدمات کو سراہا اور چیف ایگزیکٹو آفیسر ایئر مارشل ارشد ملک کی جانب سے خصوصی مہمان نوازی کا شکریہ ادا کیا۔

اس حوالے سے پاکستان انٹر نیشنل ایئر لائنز کے سی ای او ایئر مارشل ارشد ملک نے کہا کہ پی آئی اے بلاتفریق ہر مذہب کے پیروکاروں کو سہولیات فراہم کرنے میں ہمیشہ پیش پیش رہتی ہے۔

متعلقہ خبر : پاکستان اور بھارت کے درمیان جوہری تنصیبات و قیدیوں کی فہرستوں کا تبادلہ

ارشد ملک نے کہا کہ پاکستان میں تمام مذاہب کے ماننے والوں کے مقدس مقامات ہیں جن کی سیاحت کو فروغ دینا ہے۔

ایئر مارشل ارشد ملک نے کہا کہ قومی ایئر لائن نے 2021 میں شمالی علاقہ جات کے آپریشن میں توسیع اور ہندو یاتریوں کیلئے خصوصی پروازیں آپریٹ کیں۔

سی ای او پی آئی اے نے کہا کہ 2022 میں اس آپریشن میں مزید توسیع کے بعد بیساکھی کے لئے سکھ یاتریوں اور بدھ مت کے ماننے والوں کیلئے بھی پیکج ترتیب دے رہےہیں۔

واضح رہے کہ بھارتی سول ایوی ایشن نے پی آئی اے کو اپنی ایئرلائن کے دباؤ پر پرواز کی اجازت دینے سے انکار کردیا تھا، جس کے بعد پی آئی اے نے متبادل انتظامات کر کے یاتریوں کو واہگہ کے ذریعے پاکستان منتقل کیا۔