وزیراعظم کے معاون خصوصی برائے سیاسی ابلاغ ڈاکٹر شہباز گِل نے کہا ہے کہ ایل این جی کے مہنگے ترین معاہدے کر کے ملک بیچنے والے اصل مجرم ہیں۔

ڈاکٹر شہباز گِل نے شاہد خاقان عباسی کے بیان پر ردعمل دیتے ہوئے کہا کہ 15 سال کی مدت کے لیے 16 ارب ڈالر کے معاہدے کرنے والے نااہل تھے۔

انہوں نے کہا کہ ملک کا سودا کرنے والے جوابدہی کے بجائے اداروں کو متنازع بنانے کی کوشش میں ہیں، سیاسی شعبدہ باز قومی سانحات پر سیاست کررہے ہیں۔

شہباز گِل نے مزید کہا کہ حکومت، ادارے اور عوام نے ملکر مری کے سیاحوں کی مدد کی، اپوزیشن نے سانحے کو سیاسی پوائنٹ اسکورنگ کیلئے استعمال کیا۔

اس سے قبل مسلم لیگی رہنما اور سابق وزیراعظم شاہد خاقان عباسی نے میڈیا سے گفتگو کرتے ہوئے کہا تھا کہ ملک میں قانون سازی عوام پر مزید بوجھ کیلئے کی جاتی ہے۔

ان کا کہنا تھا کہ مری میں 22 افراد جاں بحق ہوگئے، کوئی سڑک صاف کرنے والا نہیں تھا ،مری حادثے کی ذمےداری کس کی ہے؟

مسلم لیگی رہنما نے کہاکہ آج بھی کوئی اسٹیٹمنٹ پی ٹی آئی نے جمع نہیں کروائی ،کیمرے لگاکر عوام کو دکھائیں کون سے کرپشن ہوئی ہے، ہم بتائیں گے نیب میں کون سی کرپشن ہوئی ہے،جو ظلم ہوئے ان کا حساب دیا جائےگا۔

سابق وزیراعظم نے کہاکہ ثاقب نثارعدالتی معاملات کاجواب آج تک نہیں دے پائے،صادق امین کے لقب عدالتی فیصلوں میں بانٹے گئے۔

انہوں نے کہاکہ سینیٹ اور اسمبلی میں عوام پر مزید ٹیکس لگانے کی تجاویز ہیں ، حکومت آئی ایم ایف سے کیے دعوے بتانے سے قاصر ہے۔

شاہد خاقان نے کہاکہ ایک کمپنی اکاؤنٹ،بینک اسٹیٹمنٹ عمران خان نے نہیں دی ، 26 اکاؤنٹس میں سےصرف 4 ظاہر کیے گئے۔

مسلم لیگی رہنما نے کہاکہ چیئرمین نیب بتائیں انہوں نے الیکشن کمیشن کی رپورٹ پڑھی ، تنخواہ نہ لینے پر وزیراعظم کو نااہل کردیا گیا۔