مولانا طاہر اشرفی کا کہنا ہےکہ سانحہ مری میں قومی ذمہ داری میں بھی کوتاہی ہوئی اور ذاتی ذمہ داری کی بھی کوتاہی ہوئی۔

وزیراعظم کے معاون خصوصی برائے بین المذاہب ہم آہنگی مولانا طاہر اشرفی نے
نیوز کانفرنس کرتے ہوئے کہاکہ سب سے پہلے مری کے سانحہ پر دکھ اور افسوس کا اظہار کروں گا اورسانحے پردعا کرنا چاہوں گا۔

انہوں نے کہاکہ وزیراعظم پاکستان نے کہا ہے کہ تمام ذمہ داران کا تعین کیا جائے گا۔

مولانا طاہر اشرفی نے مزید کہاکہ میں پاک فوج کو سلام پیش کرتا ہوں کہ وہ مدد کو پہنچے۔ تمام علماء کو خراج تحسین پیش کرتا ہوں جنہوں نے اپنی مساجد اور مدرسے کھول کر لوگوں کی مدد کی۔

ان کا کہنا تھا کہ کل بھی لوگوں کی منتیں کی گئیں  کہ مری کی طرف نا جائیں۔

یہ بھی پڑھیں: حالیہ برفباری اور بارشیں؛ مری کے علاوہ کے پی کے میں بھی 12 افراد جاں بحق

 طاہر اشرفی نے کہاکہ موجودہ حکومت میں کوئی یہ نہیں کہہ سکتا ہے پولیس اندر داخل ہو گئی ، تمام مدارس کو وزارت تعلیم کے ساتھ منسلک کیا جا رہا ہے، ہم مسجد و مدرسہ کے کل بھی محافظ تھے آج بھی محافظ ہیں۔

ان کا کہنا تھا کہ بین المذاہب ہم آہنگی کے لیے اس حکومت میں بہت کام ہوا۔

وزیراعظم کے معاون خصوصی نے کہاکہ کرسمس کے تہوار بھی امن کے ساتھ منائے گئے ،ہم تورات انجیل پر ایمان نہ لائے تو ہم مسلمان نہیں ہو سکتے، اسلام تو سب کو مانتا ہے، اگر کسی کو حضرت عیسی کی ولادت کی مبارک باد دی جائے تو یہ غلط نہیں ہے۔