پی ڈی ایم نے سانحہ مری کا ذمہ دار حکومت اور انتظامیہ کو قرار دے دیا ہے۔

ڈیمو کریٹک موومنٹ (پی ڈی ایم) کے ترجمان حافظ حمد اللہ کا کہنا تھا کہ تماتر اموات کا ذمہ دار پنجاب اور عمران خان کی نااہل اور بے حس حکومت ہے، محکمہ موسمیات نے چند دن پہلے شدید برف باری ہونے سے آگاہ کیا تو حکومت نے مری میں پیشگی حفاظتی اقدامات اور حکمت عملی کیوں ترتیب نہیں دی؟

انہوں نے کہا کہ حکومت مری جانے والے سیاحوں کو مینج کرنے کی صلاحیت نہیں رکھتی وہ دنیا بھر کے سیاحوں کو کس منہ سے پاکستان کو آنے کی دعوت دیتی ہے؟

ان کا کہنا تھا کہ کل شام تک حکومتی وزراء لاکھوں لوگوں کے مری جانے کا کریڈٹ لیتے رہے، مری کے سڑکوں پر معصوم لوگ شدید سردی سے مرتے رہے مگر عمران کٹھ پتلی وفاقی اور پنجاب حکومت سوتی رہی۔

ڈیمو کریٹک موومنٹ (پی ڈی ایم) کے ترجمان حافظ حمداللہ نے مزید کہا کہ عمران خان نے اموات کا ذمہ دار موت کے منہ میں جانے والے سیاحوں کو ہی قرار دیا، پی ڈی ایم فیصلہ کر چکی ہے کہ عمران خان اور پاکستان ایک ساتھ نہیں چل سکتا۔

واضح رہے کہ مری میں گزشتہ روز برف کا طوفان آیا تھا، جس میں ہزاروں گاڑیاں پھنس گئی تھیں۔

مری میں اس وقت ایمرجنسی رضا کاروں اور امدادی کارکنوں کے علاوہ کسی کے بھی داخلے پر پابندی ہے، پاک فوج کے دستے انتظامیہ کے ساتھ کر امدادی کاموں میں مصروف ہیں۔