ترجمان دفتر خارجہ عاصم افتخار نے کہا ہے کہ جوہری جنگ کی روک تھام کے لئے پی فائیو کا مشترکہ بیان ایک مثبت پیش رفت ہے۔

سلامتی کونسل کے پانچ مستقل ممبران (پی فائیو) کے مشترکہ بیان پر میڈیا کے سوالات کے جواب میں ترجمان دفتر خارجہ نے ردِ عمل دیتے ہوئے کہا کہ جوہری جنگ کی روک تھام اور ہتھیاروں کی دوڑ سے بچنے کے لئے پی فائیو کا مشترکہ بیان ایک مثبت پیش رفت ہے۔

 عاصم افتخار کا کہنا تھا کہ اقوام متحدہ کی سلامتی کونسل کے مستقل ارکان کے درمیان یہ مفاہمت عالمی اور علاقائی سطح پر تزویراتی استحکام کے لیے ٹھوس اقدامات کی راہ ہموار کر سکتی ہے۔

انہوں نے کہا کہ ایک ذمہ دار جوہری ہتھیاروں کی حامل ریاست ہونے کے ناطے پاکستان اقوام متحدہ کی جنرل اسمبلی کے تخفیف اسلحہ کے پہلے خصوصی اجلاس کی شرائط کے مطابق عالمی اور علاقائی سطح پر غیر امتیازی جوہری تخفیف اسلحہ اور عدم پھیلاؤ کے مقاصد کی حمایت کرتا ہے۔

ان کا کہنا تھا کہ پی فائیو کا بیان جوہری تخفیف اسلحے پر بامعنی پیش رفت کے لیے سازگار حفاظتی ماحول پیدا کرنے کی ضرورت کو بجا طور پر تسلیم کرتا ہے، پی فائیو کے بیان میں ریاستوں کے بنیادی سلامتی کے خدشات کو دور کرنا، تنازعات  کے حل کے لئے بحرالکاہل تصفیہ، اور غیر ستحکم ہتھیاروں کی تعمیر کو روکنا شامل ہے۔

عاصم افتخار نے کہا کہ جنوبی ایشیا کے تناظر میں پاکستان میں ایک اسٹریٹجک ریسٹرینٹ رجیم کی تجویز موجود ہے، اس تجویز میں جوہری اور میزائل تحمل، روایتی توازن اور تنازعات کا حل شامل ہے۔

ترجمان دفتر خارجہ عاصم افتخار کا مزید کہنا تھا کہ پاکستان کی تجویز تزویراتی استحکام کو برقرار رکھنے اور فوجی تنازعات سے بچنے میں اہم کردار ادا کر سکتی ہے، پاکستان جوہری ہتھیاروں کے کسی بھی غیر مجاز یا غیر ارادی استعمال کے خلاف حفاظت کے لیے تمام جوہری طاقتوں کی جانب سے موثر اقدامات کی ضرورت سے مکمل اتفاق کرتا ہے۔