گورنر خیبرپختونخواہ نے کہا ہے کہ ہمارے مذہب و معاشرہ میں کرپشن کی بالکل گنجائش نہیں ہے۔

گورنر خیبرپختونخواہ شاہ فرمان نے قومی احتساب بیورو پشاور آفس کا دورہ کیا جہاں گورنرشاہ فرمان کو ڈی جی نیب بریگیڈیئر ناصر فاروق اعوان کی جانب سے نیب پشاور کی مجموعی کارکردگی پر بریفنگ دی گئی۔

بریفنگ  دیتے ہوئے کہا گیا کہ نیب پشاور نے مختلف مقدمات میں 15 ارب روپے ریکورز کئے،1940 انکوائریز مکمل جبکہ 371 ریفرنسز بھی مکمل کئے گئے۔

اس موقع پر گورنر خیبرپختونخواہ شاہ فرمان نے نیب پشاور کیجانب سے مختلف انکوائریز میں ضبط شدہ پراپرٹیز کے 1 ارب 11 کروڑ مالیت کے چیک بھی متعلقہ اداروں کے حوالے کئے جبکہ گورنر خیبرپختونخواہ نے نیب پشاور میں بہترین کارکردگی دکھانے والے آفیسرز اور آفیشلز میں تعریفی اسناد بھی تقسیم کیں۔

گورنر خیبرپختونخواہ شاہ فرمان نے کہا کہ اسلامی معاشرہ ہونے کے باوجود کرپشن کا ہونا لمحہ فکریہ ہے۔

انہوں نے کہا کہ نیب کا بدعنوانی کیخلاف زیرو ٹالرنس پالیسی اورعزم قابل تعریف ہے، موجودہ حالات میں نیب کی کرپشن کیخلاف کارکردگی قابل ستائش ہے۔

گورنر خیبرپختونخواہ شاہ فرمان کا مزید کہنا تھا کہ ہمارے مذہب و معاشرہ میں کرپشن کی بالکل گنجائش نہیں ہے، عوام میں کرپشن کیخلاف آگاہی پیدا کرنے اور لوگوں کا مائینڈ سیٹ تبدیل کرنا انتہائی ضروری ہے۔