گورنر خیبرپختونخوا شاہ فرمان نے کورونا کی نئی لہرکے تناظر میں لوگوں سے حفاظتی ویکسین لگانے کی اپیل ہے۔

شاہ فرمان نے خیبرمیڈیکل یونیورسٹی ماس ویکسینیشن سینٹر کا دورہ کیا جہاں انہوں نے کے ایم یو ویکسی نیشن سنٹر میں فائیزرکی بوسٹر ڈوز لگائی۔

وائس چانسلر پروفیسر ضیاء الحق نے گورنر کو بریفنگ دیتے ہوئے کہا کہ کے ایم یو پبلک ہیلتھ ریفرنس لیبارٹری میں روزانہ 6000 پی سی آر ٹیسٹ اور 24 گھنٹے کے اندر آن لائن رپورٹنگ ہوتی ہے، کے ایم یوڈرائیو تھرو ویکسی نیشن سنٹر میں روزانہ تقریباً 4000 افراد کو ویکسین لگانے کی سہولت دستیاب ہے۔

انہوں نے کہا کہ کے ایم یوپبلک ہیلتھ ریفرنس لیب میں روزانہ کی بنیاد پر جینومک سیکوینسنگ بھی کی جاتی ہے، خیبرپختونخوا کے تقریباً 85 فیصد مثبت کیسز اومیکرون ویریئنٹ کے ہیں۔

وائس چانسلر پروفیسر ضیاء الحق کا مزید کہنا تھا کہ خوش قسمتی سے اومیکرون کے لیے ہسپتال میں داخل ہونے کا خطرہ کورونا کی پچھلی اقسام کے مقابلے میں نسبتاًکم ہے، فلو جیسی علامات یا گلے میں خراش کی صورت میں لیبارٹری ٹیسٹ کی تصدیق تک خود کو دیگر لوگوں سے الگ تھلگ کرنا چاہیے۔

اس موقع پر شاہ فرمان نے کہا کہ کوویڈ 19 کے بحران سے نمٹنے میں کے ایم یو کی خدمات ناقابل فراموش ہیں۔

گورنر خیبر پختونخوا شاہ فرمان نے کمیونٹی سے ویکسی نیشن کے ذریعے اومیکرون کے غیر معمولی تیزی سے پھیلاؤ کو روکنے میں کردار ادا کرنے کی اپیل کی اور کہا کہ توقع ہے خیبرمیڈیکل یونیورسٹی کورونا سمیت دیگر وبائی امراض سے نمٹنے میں بھی کلیدی کرداراداکرے گی۔