متحدہ قومی موومنٹ (ایم کیوایم) پاکستان کے رکن رابطہ کمیٹی فیصل سبزواری ایک بار پھر کورونا وائرس میں مبتلا ہوگئے ہیں۔

ایم کیو ایم  رہنما اور سینیٹر فیصل سبزواری نے ٹوئٹر پر جاری ایک پیغام میں کہا ہے کہ میری اہلیہ کا کورونا ٹیسٹ بھی مثبت آگیا ہے۔

 انہوں نے کہا کہ ڈیڑھ سال میں دوسری بار کورونا ہو گیا ہے ، آج دوسرا دن ہے ، جون 2020 اور جنوری 2022 میں بطور مریض سب سے واضح فرق مرض کی علامات و اثرات میں کم از کم 95 فیصد کمی ہے۔

فیصل سبزواری نے کہا کہ اطمینان ہے کہ میں نے ویکسین اور بوسٹر دونوں لگوائی ہوئی ہیں ، ویکسین لگوائیں، ماسک پہنیں اور محفوظ رہیں۔

مجھے ڈیڑھ برس میں دوسری بار کورونا ہو گیا ہے۔آج دوسرا دن ہے لیکن جون 2020 اور جنوری 2022 میں بطور مریض سب سے واضح فرق مرض کی علامات و اثرات میں کم از کم 95 فیصد کمی ہے۔ اطمینان ہے کہ میں نے ویکسین اور بوسٹر دونوں لگوائے ہوئے ہیں۔ ویکسین لگوائیں،محفوظ رہیں، ماسک پہنیں #Covid19

— Faisal Subzwari (@faisalsubzwari) January 16, 2022

واضح رہے کہ اس سے قبل 4 جون 2020 کو متحدہ قومی موومنٹ (ایم کیوایم) پاکستان کے رکن رابطہ کمیٹی فیصل سبزواری بھی کورونا وائرس میں مبتلا ہوئے تھے۔

سماجی رابطے کی ویب سائٹ ٹوئٹر پر اپنے پیغام میں فیصل سبزواری کا کہنا تھا کہ گزشتہ دنوں میرے والدین، زوجہ، 2 بیٹیاں کورونا میں مبتلا ہوئے،  آج میرا کورونا ٹیسٹ بھی مثبت آگیا۔

فیصل سبزواری نے  تمام احباب سے دعاؤں کی درخواست کی تھی۔

28 جون 2020 کو متحدہ قومی موومنٹ (ایم کیو ایم ) پاکستان کے رہنما فیصل سبزواری نے کورونا وائرس  کو شکست دی تھی۔

فیصل سبزواری نے سماجی رابطے کی ویب سائٹ پر اپنے پیغام میں کہا کہ ﷲ کے فضل اور دوستوں کی دعاؤں سے میں اور تمام اہل خانہ کورونا سے متاثر ہونے کے بعد روبصحت ہیں۔

فیصل سبزواری کا کہناتھا کہ یہ 3 ہفتے بہت مشکل تھے خاص کر والدہ کی صحت کے حوالے سے، تاہم یہ وقت بھی گزر گیا۔