افریقی ملک کیمرون میں گزشتہ سال وبائی مرض ہیضہ کو کسی حد تک کنٹرول کرنے کا اعلان کیا گیا تھا، مگر یہ جان لیوا مرض اب دوبارہ پھیل رہا ہے۔

گزشتہ سال اس مرض سے 5 افراد کے مرنے کی اطلاعات تھیں ، لیکن رواں سال اس وباء کے بگڑے تیور نے مزید 30 افراد کی جان لے لی ہے۔

کیمرون کے طبی ماہرین کے مطابق یہ جان لیوا وباء کیمرون کے مزید تین علاقوں میں پائی گئی ہے.

کیمرون کی وزارت صحت نے اس وباء سے متاثر ایک ہزار 242 نئے مریضوں کی تصدیق کر دی ہے۔

کیمرون کا جنوب مغربی علاقہ بنیادی طور پر گزشتہ کئی سالوں سے پرتشدد علاقہ رہا ہے، شورش زدہ علاقے میں بنیادی سہولتوں کی فراہمی کیمرون کی حکومت کے لئے ایک مسلہ بن چکی ہے۔

ان علاقوں میں تقریباً ایک لاکھ کے قریب لوگ مقیم ہیں جو زیادہ تر غربت کی سطح سے نیچے کی زندگی گزارنے پر مجبور ہیں.

بین الاقوامی رپورٹس کے مطابق یہ وباء باکاسی پینن سلوا کے علاقے میں پہلے مرتبہ منظر عام پر آئی تھی ، جس کے بعد آہستہ آہستہ دوسرے علاقوں تک پھیل گئی۔

وزارت صحت نے کیمرون کی حکومت سے مطالبہ کیا ہے اس وباء کے مکمل خاتمے کے لئے سنجیدگی سے غور کرنا ہو گا ، ورنہ یہ وباء ہزاروں انسانی زندگیاں نگل سکتا ہے۔