فواد چوہدری نے کہا ہے کہ پاکستان اور مصر کے درمیان عظیم ثقافتی ورثہ موجود ہے۔

وفاقی وزیر اطلاعات فواد چوہدری سے مصر کے سفیر ڈاکٹر طارق دروگ کی ملاقات ہوئی جس میں ڈرامہ، فلم سمیت علاقائی و عالمی صورتحال سمیت باہمی دلچسپی کے امور پر تبادلہ خیال کیا گیا۔

ملاقات میں پاکستان اور مصر کی فلموں اور ڈراموں کا ترجمہ کرنے کیلئے ڈبنگ سینٹرز کھولنے پر اتفاق ہوا جبکہ ملاقات میں افغانستان کی صورتحال اور وزیراعظم عمران خان کے دورہ چین کے حوالے سے بھی گفتگو ہوئی۔

اس موقع پر وفاقی وزیر اطلاعات فواد چوہدری نے کہا کہ پاکستان اور مصر کے دیرینہ برادرانہ تعلقات قائم ہیں، دونوں ممالک کے لوگ مذہبی، ثقافتی اور بھائی چارگی کے رشتوں سے جڑے ہیں۔

انہوں نے کہا کہ پاکستان اور مصر کے درمیان عظیم ثقافتی ورثہ موجود ہے جبکہ عالمی امور پر پاکستان اور مصر کا یکساں موقف رہا ہے۔

وفاقی وزیر اطلاعات کا کہنا تھا کہ افغانستان میں بڑا انسانی المیہ جنم لے رہا ہے، اس صورتحال میں افغان عوام کو تنہاء نہیں چھوڑا جا سکتا۔

فواد چوہدری نے کہا کہ افغان عوام کی مدد  کے لئے دنیا کو آگے آنا ہوگا، اس ضمن میں مصر بھی اپنا کردار ادا کرے۔

وفاقی وزیر اطلاعات فواد چوہدری کا مزید کہنا تھا کہ وزیراعظم عمران خان اپنے دورہ چین کے دوران افغانستان کے مسئلہ پر بھی بات کریں گے۔

ملاقات میں مصر کے سفیر ڈاکٹر طارق دروگ نے وقت فراہم  کرنے پر وفاقی وزیر اطلاعات چوہدری فواد حسین کا شکریہ ادا کیا۔

مصر کے سفیر ڈاکٹر طارق دروگ نے کہا کہ مصر پاکستان کے ساتھ اپنے تعلقات کو مزید فروغ دینے کا خواہاں ہے۔