یوکرین کے صدر نے اپنے ایک تازہ بیان میں کہا ہے کہ عالمی برادری نے عین وقت پر ہم سے منہ موڑ لیا ہے۔

یوکرین کے صدر ولادیمیر زیلنسکی نے اپنے بیان میں کہا ہے کہ روس افواج کی جارحیت سے قبل عالمی برادری نے مکمل حمایت کا اعلان کیا تھا مگر جب روسی افواج حملہ آور ہوئیں تو سب نے تنہا چھوڑ دیا ہے۔

بین الاقوامی خبروں کے مطابق روسی افواج بیلاروس کے راستے یوکرین میں داخل ہو رہی ہیں۔

ذرائع کے مطابق یوکرین کے دارالحکومت کیف میں روسی افواج کے داخل ہونے کی بھی متضاد اطلاعات موصول ہو رہی ہیں۔

بین الاقوامی خبر رساں ادارے کی خبر کے مطابق روسی افواج دارالحکومت کیف سے صرف چند کلومیٹر کے فاصلے پر موجود ہیں اور کسی بھی وقت کیف میں داخل ہو سکتی ہیں۔

خبر کے مطابق روسی افواج نے کیف کے ائیرپورٹ پر قبضہ کرنے کے دعویٰ کیا مگر یوکرینی وزیر دفاع کا کہنا ہے کہ روسی افواج کی ائیرپورٹ کی جانب پیش قدمی کو روک دیا گیا ہے۔

یوکرین کے صدر ولادیمیر زیلنسکی نے اپنے بیان میں عالمی برادری کی جانب سے عین وقت پر منہ پھیرنے پر شکوہ کرتے ہوئے کہا کہ عالمی برادری ہمیں بے شک تنہا کر دے مگر ہم روس سے ڈرنے والے نہیں ہیں۔

یوکرین کے صدر نے کہا روسی حملے کے وقت سے ابھی عالمی دنیا اور خاص طور پر مغربی ممالک دور سے بیٹھ کر تماشا دیکھ رہے ہیں، لیکن ہم اپنی سرزمین کا اکیلے ہی دفاع کر رہے ہیں۔

یوکرین کے صدر نے یہ بھی کہا کہ 25 سے زائد یورپی رہنماؤں سے نیٹو میں شامل ہونے سے متعلق پوچھا لیکن کسی نے بھی خوف کے باعث جواب نہیں دیا۔ اب تک کوئی بھی یوکرین کی مدد کو نہیں آیا۔

صدر ولادیمیر زیلنسکی نے بتایا کہ روس کے ساتھ جنگ کے پہلے روز فوجیوں سمیت 137 افراد ہلاک ہوئے لیکن ہم ڈرنے والے نہیں۔ روسی جارحیت کا بھرپور مقابلہ کریں گے۔

روس کے یوکرین پر حملے کے بعد مغربی ممالک نے روس پر پابندیاں تو عائد کردی ہیں، لیکن اب تک کہیں سے فوجی امداد آئی اور نہ ہی نیٹو فوج مدد کو پہنچی ہیں۔