سعودی عرب نے کورونا وائرس کے نئے ویرئینٹ “اومیکرون” کے پھیلاؤ کو روکنے کے لیے بیرون ملک مقیم مسافروں پر سفری پابندیاں مزید سخت کر دی ہیں۔

بین الاقوامی خبر رساں ادارے کے مطابق سعودی عرب میں داخلے کے لیے ویکسی نیشن اور منفی پی سی آر یا ریپڈ ٹیسٹ کو لازمی قرار دے دیا گیا ہے اور یہ ٹیسٹ سعودی عرب روانگی کے 48 گھنٹے کے اندر کرانا ہوگا۔

سعودی ایوی ایشن کی جانب سے جاری کردہ گائیڈ لائنز میں کہا گیا ہے کہ 8 سال سے کم عمر بچوں کو ویکسی نیشن اور ٹیسٹنگ کی پابندیوں سے مستثنیٰ قرار دیا جائے گا۔

اسی طرح سعودی عرب سے روانگی کے خواہش مند مسافروں کے لیے بوسٹر کی خوراک لازمی قرار دی گئی ہے اور بوسٹر کی شرط زیادہ سے زیادہ 3 ماہ کے لیے لاگو کی گئی ہے۔

سعودی ایوی ایشن کے ایک بیان میں کہا گیا ہے کہ سفری پابندی کا اطلاق بدھ 9 فروری سے ہو گا اور اس حکم کی خلاف ورزی کرنے والوں کے خلاف مسافروں کو بلیک لسٹ کرنے کے ساتھ ساتھ دیگر قانونی کارروائیاں بھی کی جائیں گی۔

واضح رہے کہ سعودی وزارت داخلہ نے ماسک پہننے پر پابندی کی خلاف ورزی پر ایک ہزار ریال تک جرمانے کا اعلان کیا ہے، تاہم بار بار خلاف ورزی کرنے والوں پر ایک لاکھ  ریال تک جرمانہ عائد کیا جا سکتا ہے۔