آسٹریلیا کے خلاف ہوم سیریز کے لئے پاکستان کے ٹیسٹ اسکواڈ کے کھلاڑی آج کراچی کے کیمپ میں شرکت کریں گے۔

تربیتی کیمپ میں پاکستان ٹیسٹ اسکواڈ کے امام الحق، نعمان علی، اظہر علی، فواد عالم، سعود شکیل اور ساجد خان کے علاوہ لیگ اسپنر یاسر شاہ اور فاسٹ بالر محمد عباس بھی شریک ہوں گے۔

پی ایس ایل سیزن 7 میں اسلام آباد یونائیٹڈ کے کھلاڑی لیگ اسپنر زاہد محمود فی الحال لیگ مصروفیات کے باعث تربیتی کیمپ میں شرکت نہیں کریں گے۔

ریڈ بال کرکٹ کے کھلاڑیوں کو بھرپور ٹریننگ دینے کے لئے پی سی بی نے اضافی کھلاڑیوں کو بھی طلب کر لیا ہے جس میں علی عثمان، ارشداللہ ، احمد بشیر، حسیب اللہ ، رضا المصطفیٰ ، تاج ولی ، محمد علی اور عالیان محمود شامل ہیں۔

تربیتی کیمپ میں شریک تمام کھلاڑیوں اور اسٹاف کا پی سی آر ٹیسٹ کیا گیا ہے، کورونا سے متاثر ہونے والے عرفان اللہ نے تربیتی کیمپ میں شرکت نہیں کریں گے۔

فاسٹ بالر عرفان اللہ کی جگہ انڈر 19 کے پیسر محمد ذیشان کو تربیتی کیمپ میں طلب کر لیا گیا ہے۔

کھلاڑیوں کی تربیت کے لئے کراچی کے نیشنل اسٹیڈیم میں تمام انتظامات مکمل کر لئے گئے ہیں، بیٹنگ پریکٹس کے لئے 5 نئی پچز تیار کی گئی ہیں جو بالرز اور بیٹسمین دونوں کے لئے سازگار ہوں گے۔

پاکستان کے سابق ٹیسٹ کپتان محمد یوسف کھلاڑیوں کی بیٹنگ تکنیکس کو نکھارنے کے لئے کوچ کے طور پر مقرر کئے گئے ہیں۔