ڈمپر اور کیری وین کے درمیان ہونے والے تصادم سے  2 افراد جاں بحق جبکہ ایک شدید زخمی ہوگیا ہے۔

تفصیلات کے مطابق یہ خطرناک حادثہ راولپنڈی کے صدر مال روڈ پر پیش آیا، جہاں ڈمپر اور کیری وین میں تصادم سے 2 افراد جاں بحق اور ایک شدید زخمی ہوا ہے۔

ریسکیو حکام کا کہنا ہے کہ لعشوں اور زخمی شخص کو ڈی ایچ کیو اسپتال منتقل کر دیا گیا ہے۔

ریسکیو حکام نے مزید بتایا کہ حادثہ تیز رفتار کے باعث پیش آیا۔

واضح رہے کہ دنیا  بھرمیں ٹریفک حادثے انسانی جانوں کے لیے ایک بڑے خطرے کے طور پر سامنے آ رہے ہیں، عالمی ادارہ صحت کے مطابق ہر سال لاکھوں افراد ٹریفک حادثات کی وجہ سے اپنی جانوں سے ہاتھ دھو بیٹھتے ہیں۔

ایک عالمی تحقیقاتی ادارے کے مطابق پاکستان میں ہلاکتوں کا باعث بننے والے پچاس عوامل اوربیماریوں میں ٹریفک حادثات پندرہویں نمبر پر ہیں۔

 پاکستان میں ایڈز، ناقص خوراک،  مرگی، تشدد کئی قسم کے سرطان اور خود کشیوں کی وجہ سے انفرادی طور پر ہونے والی اموات سے ٹریفک حادثات میں مرنے والے لوگوں کی تعداد زیادہ ہے۔

اس رپورٹ کے مطابق سب سے زیادہ ٹریفک حادثات موٹر سائیکل سواروں آٹو رکشا والوں اور موٹر کاروں اور وینز چلانے والوں کو پیش آئے اس کے بعد بسوں اور ٹرکوں کے حادثات رپورٹ ہوئے ہیں۔