وزیراعلیٰ بلوچستان نے کہا ہے کہ عوام کے تعاون سے دہشت گردی کی عفریت کا خاتمہ کریں گے۔

اپنے ایک بیان میں وزیراعلیٰ بلوچستان میرعبدالقدوس بزنجو نے چمن میں روغانی روڈ لیول کراس لیویز چیک پوسٹ پر بم حملے کی مذمت کی ہے۔

میرعبدالقدوس بزنجو نے دھماکہ کے نتیجے میں اہلکاروں اور شہری کے زخمی ہونے پر افسوس کا اظہار کیا ہے۔

اس موقع پر وزیراعلیٰ بلوچستان نے علاقے کی سکیورٹی کو مزید موثر بنانے کی ہدایت دی جبکہ وزیراعلیٰ بلوچستان نے تمام زخمیوں کو علاج معالجے کی بہترین سہولیات فراہم کرنے کی بھی ہدایت دی۔

میرعبدالقدوس بزنجو نے کہا کہ چمن جیسے تجارتی شہر کو دہشت گردوں نے اپنا نشانہ بنایا، عوام کے تعاون سے دہشت گردی کی عفریت کا خاتمہ کریں گے۔

وزیراعلیٰ بلوچستان میرعبدالقدوس بزنجو کا کہنا تھا کہ صوبائی حکومت عوام کی جان و مال اور روزگار کے تحفظ کو یقینی بنائے گی۔

واضح رہے کہ چمن میں لیول کراس لیویز چوکی پر بم دھماکے میں لیویز اہلکاروں سمیت 6 افراد زخمی ہو گئے ہیں۔

نامعلوم دہشت گردوں نے بم دھماکے کے ذریعے لیویز چوکی کو نشانہ بنایا جس کے نتیجے میں ایک راہگیر بچے سمیت 6 افراد زخمی ہو گئے ، زخمی افراد میں 2 لیویز اہلکار بھی شامل ہیں ۔

بم دھماکے کے نتیجے میں زخمی ہونے والے زخمیوں کو سول اسپتال منتقل کردیا گیا ہے۔