حسان خاور نے کہا ہے کہ گزشتہ ادوار میں جنوبی پنجاب کو ہر شعبے میں نظر انداز کیا گیا صرف سیاسی مقاصد کے لیے عوام استعمال ہوئے اور انھیں ان کے بنیادی حقوق بھی نہ ملے۔

پنجاب حکومت کے ترجمان حسان خاور نے اپنے ٹوئٹر پیغام میں کہا کہ عمران خان کی قیادت میں اب جنوبی پنجاب کے لوگ بھی صحت کارڈ کے ذریعے بہترین اور باعزت علاج کروا سگیں گے جو ان کے احساس محرومی کو دور کرے گا۔

گزشتہ ادوار میں جنوبی پنجاب کو ہر شعبے میں نظر انداز کیا گیا صرف سیاسی مقاصد کے لیے عوام استعمال ہوئے اور انھیں ان کے بنیادی حقوق بھی نا ملے،عمران خان کی قیادت میں اب جنوبی پنجاب کے لوگ بھی صحت کارڈ کے زریعے بہترین اور باعزت علاج کروا سگیں گے جو ان کے احساس محرومی کو دور کرے گا https://t.co/BnyXimbYoi

— Hasaan Khawar (@hasaankhawar) February 22, 2022

 ملتان ڈویژن سمیت پورے جنوبی پنجاب میں قومی صحت کارڈ کا اجراء کردیا گیا ہے۔

ذرائع کے مطابق تمام شہریوں کے شناختی کارڈ کو صحت کارڈ کا درجہ دے دیا گیا، نیا پاکستان قومی صحت کارڈ گھر کے سربراہ کو جاری کیا جارہا ہے اور ہر خاندان کیلئے 10 لاکھ روپے کی رقم مختص کی گئی ہے۔

ذرائع نے بتایا کہ اہلیت جاننے کیلئے شہری 8500 پر ایس ایم ایس کرسکتے ہیں اور مزید کسی بھی معلومات کیلئے ہیلپ لائن نمبر 09009-0800 پر کال کریں۔

صحت کارڈ پر کن بیماریوں کا علاج کیا جاتا ہے؟

صحت سہولت پروگرام کے تحت ایک خاندان کے تمام افراد کے لیے 10 لاکھ روپے سالانہ مقرر کیے گئے ہیں، تاہم اس کا طریقہ کار یہ ہے کہ گھر کے کسی ایک فرد پر یہ تمام رقم خرچ نہیں کی جاتی بلکہ اس میں خاندان کے ہر فرد کے لیے ایک حد مقرر کر دی گئی ہے۔

اس پروگرام کی دستیاب معلومات کے مطابق ترجیحی علاج میں بیماریوں کی فہرست یہ ہے۔ امراض قلب اور شریان، اتفاقیہ اور حادثاتی علاج، ثانوی سطح کی بیماریوں کی پیچیدگی کی صورت میں ریفرل، ذیابیطس کی پیچیدگیاں، گردے کی پیوندکاری، مصنوعی بازو یا ٹانگ، ہر قسم کا کینسر، گردے اور مثانے کی بیماریاں بشمول ڈائلیسس، چھاتی کے سرطان کی اسکریننگ اور نیورو سرجری۔