خرم شیر زمان نے کہا ہے کہ ن لیگ اور پی پی مکمل جہالت میں ڈوب چکی ہے۔

پی ٹی آئی پارلیمانی لیڈر خرم شیر زمان نے اپنے جاری کردہ ایک بیان میں کہا کہ وزیر اعظم کی چینی صدر شی جن پنگ سے خوشگوار ملاقات کی ویڈیو نے اپوزیشن پر سوگ طاری کردیا ہے۔

پی ٹی آئی پارلیمانی لیڈر نےکہا کہ وزیر اعظم کے دورہ چین پر اپوزیشن کے تمام پروپیگنڈے ناکام ہوگئے، اپوزیشن ایسے پروپیگنڈے کو بےشرمی نہیں بلکہ اپنا کمال سمجھتی ہے۔

شیر زمان نے کہا کہ ن لیگ اور پی پی کی جگہ کوئی حیا دار ہوتا تو اب تک گوشہ نشین ہوجاتا۔

ان کا کہنا تھا کہ ن لیگ اور پی پی مکمل جہالت میں ڈوب چکی ہے، عمران خان کو گرانے والے خود قوم کے سامنے گر چکے ہیں۔

پی ٹی آئی پارلیمانی لیڈر خرم شیر زمان کا مزید کہنا تھا کہ چین نے عمران خان کا انتہائی بےمثال اور پروقار استقبال کیا، عمران خان کا دورہ چین دونوں ممالک کے درمیان تعلقات کو مزید مستحکم کریگا۔

واضح رہے کہ اتوار کی صبح بیجنگ سے اسلام آباد کے لیے روانگی سے قبل عمران خان نے وفد کے ہمراہ چین کے صدر شی جن پنگ سے آن لائن ملاقات کی۔

 ملاقات میں دونوں رہنماؤں کے درمیان دو طرفہ تعلقات اور خطے کی صورتحال پر تفصیلی گفتگو ہوئی۔

اس اہم ملاقات میں سی پیک، افغانستان سمیت دیگر اہم امور بھی زیر غور آئے ۔

دورہ چین، وزیراعظم کی دیگر عالمی رہنماؤں سے اہم ملاقاتیں

گزشتہ روز وزیراعظم عمران خان نے چینی ہم منصب اور ازبکستان کے صدر سمیت دیگر عالمی رہنماؤں سے اہم ملاقاتیں کی ہیں۔

وزیراعظم عمران خان نے چینی ہم منصب سے ملاقات کی جس میں وزیر خارجہ شاہ محمودقریشی، اسد عمر، شوکت ترین اور فواد چوہدری بھی موجود تھے۔

دونوں رہنماؤں کے درمیان ملاقات کے دوران دو طرفہ تعلقات کے تمام پہلوؤں کا جائزہ لیا گیا جب کہ دو طرفہ اقتصادی اور تجارتی تعلقات، سی پیک کے آگے بڑھنے ، علاقائی وعالمی تشویش کے اہم امور پر تبادلہ خیال کیا گیا۔