حکومت نے سرکاری ملازمین کی تنخواہوں میں اضافے کا اعلان کردیا۔

 حکومت نے کم تنخواہ والے سرکاری ملازمین کی تنخواہ میں 15 فیصد اضافے کا اعلان کیا ہے، تنخواہوں میں اضافے کا اطلاق یکم مارچ سے ہوگا۔

ذرائع کے مطابق بی ایس 1 سے 19 گریڈ تک کے سرکاری ملازمین کی بنیادی تنخواہ پر 15 فیصد اضافہ کیا جائے گا۔

وزارت خزانہ کا کہنا ہے کہ 15 فیصد سپیرٹی الاؤنس میں اضافے کی سفارش کردی گئی ہے، صوبائی حکومتوں کو بھی ملازمین کو اپنے فنڈز سے الاؤنس دینے کی سفارش کی گئی ہے۔

ترجمان وزارت خارجہ کا کہنا ہے کہ ایڈہاک ریلیف الاؤنس بنیادی تنخواہ میں ضم کرنے کا فیصلہ بعد میں ہوگا، ٹائم اسکیل پروموشن کی سمری پر بھی غور کیا جارہا ہے۔

سرکاری ملازمین کا تنخواہوں میں اضافہ کے اعلان پر جشن

ذرائع کے مطابق سرکاری ملازمین اس اعلان کے بعد جشن منانے کےلئے ڈی چوک میں جمع ہونا شروع ہوگئے۔

سی ڈی اے، پوسٹل سروسز، ٹیچرز یونینز کے ملازمین ڈی چوک میں جمع ہوکر خوشی سے  ڈھول کی تھاپ پر بھنگڑے اور نعرے بازی کر رہے ہیں۔

سیکرٹریٹ ملازمین نے وزارت خزانہ میں بھی جمع ہوکر اظہار تشکر منانے کا اعلان کیا ہے۔

اس وقت ملک میں معیشت اپنے پاؤں پر کھڑی ہو رہی ہے، فواد چوہدری

اس اعلان سے قبل فواد چوہدری کا کہنا تھا کہ اس وقت ملک میں معیشت اپنے پاؤں پر کھڑی ہو رہی ہے۔

وفاقی وزیر اطلاعات ونشریات فواد چوہدری نے سوشل میڈیا پر جاری اپنے بیان میں کہاکہ صحت کارڈ کے بعد تنخواہوں میں 15 فیصد مزید اضافہ ہوا،اس وقت ملک میں معیشت اپنے پاؤں پرکھڑی ہو رہی ہے۔

صحت کارڈ کے بعدتنخواہوں میں 15 فیصدمزید اضافہ ، اس وقت ملک میں معیشت اپنے پاؤں پر کھڑی ہو رہی ہے انشاللہ ایک سال میں آمدنیوں میں مزید اضافہ ہو گا عمران خان پاکستان کو اسلامی فلاحی مملکت بنا رہے ہیں اور تمام اقدامات اسی منشور کو سامنے رکھ کر لئے جا رہے ہیں #PTIGovernment

— Ch Fawad Hussain (@fawadchaudhry) February 10, 2022

انہوں نے مزید کہاکہ انشااللہ ایک سال میں آمدنیوں میں مزید اضافہ ہو گا عمران خان پاکستان کو اسلامی فلاحی مملکت بنا رہے ہیں اور تمام اقدامات اسی منشور کو سامنے رکھ کر لئے جا رہے ہیں۔

یہ بھی پڑھیں: سیاست میں آنے کامقصد ملک کو کرپٹ حکمرانوں سے نجات دلانا ہے، وزیراعظم