روم کا دورہ کرنے والی ایک سوشل میڈیا انفلوئنسر کو قابلِ اعتراض لباس کی وجہ سے ویٹیکن سٹی سے باہر نکال دیا گیا۔

جوجو وئیراواس نامی انفلوئنسر کا دعویٰ ہے کہ وہاں کے عملے نے انہیں ‘بہت زیادہ قابل اعتراض حالت’ میں ہونے کی وجہ سے وہاں سے چلے جانے کا حکم دیا تھا۔

جوجو جنوری میں ویٹیکن میں اپنے دن کا لطف اٹھا رہی تھیں۔ انہیں معلوم نہیں تھا کہ ان کے لباس کا انتخاب ایک مسئلہ ثابت ہوگا۔

برزایل سے تعلق رکھنے والی انسٹاگرام ماڈل نے الزام لگایا کہ انہیں بتایا گیا کہ وہ مناسب لباس نہیں پہنی ہوئیں اس لیے آپ کو مقدس مقام سے جانا ہوگا۔

جوجو کہتی ہیں کہ وہ اس شخص کی جانب سے نکالے جانے پر “بے عزتی” محسوس کر رہی ہیں، حالانکہ وہ صرف تصویریں لینے کے لیے مقدس شہر گئی تھیں۔

خیال رہے کہ ویٹیکن سٹی عیسائیت کا ایک مقدس شہر سمجھا جاتا ہے۔

جوجو نے بتایا کہ “وہاں کام کرنے والا ایک شریف آدمی میرے قریب آیا اور کہا کہ یہ جگہ عبادت کے لیے ہے اور میں نے مناسب لباس نہیں پہنا ہوا، اس نے مجھے وہاں سے جانے کے لیے کہا اور ویٹیکن سے باہر نکال دیا”۔

جوجو کی ویٹیکن میں لی گئی ایک تصویر

جوجو نے مزید کہا کہ وہاں دوسرے لوگ بھی تھے جنہوں نے یہ سب سنا اور انہیں شرمندگی کا سامنا کرنا پڑا۔

خیال رہے کہ ویٹیکن میں مرد اور خواتین زائرین دونوں کے لیے لباس کا سخت ضابطہ اخلاق نافذ ہے، ویٹیکن میں کندھوں اور گھٹنوں کو ہر وقت ڈھانپنے کی ضرورت ہوتی ہے۔

سرکاری ویب سائٹ کے مطابق، “خواتین کو بغیر آستین والے ٹاپس، کراپ ٹاپس، یا تنگ قمیضیں پہننے کی اجازت نہیں ہے۔ کندھوں کو ڈھانپنا ضروری ہے، اگر اسکرٹ یا لباس پہنا ہے تو وہ گٹھنوں سے نیچے ہونا ضروری ہے۔ “

جوجو کا وہ لباس جس کی وجہ سے انہیں ویٹیکن سے بے دخل کیا گیا

تاہم، جوجو کو اپنے دورے سے پہلے اس ضابطہ اخلاق کے بارے میں علم نہیں تھا۔

انسٹاگرام پر اس “ناخوشگوار صورتحال” کی کہانی شئیر کرنے پر جوجو کو اپنے 26,400 فالوورز کی جانب سے کافی ہمدردی ملی۔

ایک شخص نے تبصرہ کیا کہ، “یہ انتہائی مضحکہ خیز ہے۔”

تاہم، دوسروں نے وضاحت کی کہ ڈریس کوڈ کی خلاف ورزی کرنے والوں کو وہاں سے جانے کے لیے کہا جانا کوئی غیر معمولی بات نہیں تھی۔

ایک تیسرے شخص نے لکھا، “اگر آپ گہرے گلے کی شرٹس، بہت تنگ کپڑے پہن کر جاتے ہیں، تو یہ معمول ہے۔ انہوں نے میری بھانجی کو بھی منی اسکرٹ اور کھلے پیٹ کے ساتھ اندر نہیں جانے دیا تھا۔”