وزیر خارجہ مخدوم شاہ محمود قریشی نے کہا ہے کہ سندھ حکومت کے کالے قانون کے خلاف ہر سیاسی جماعت سراپا احتجاج ہے۔

صدر پی ٹی آئی سندھ و وفاقی وزیر برائے بحری امور سید علی زیدی نے وزارتِ خارجہ میں وائس چیئرمین پاکستان تحریک انصاف و وزیر خارجہ مخدوم شاہ محمود قریشی سے ملاقات کی جس میں سندھ کی سیاسی صورتحال بالخصوص سندھ لانگ مارچ کے حوالے سے  تبادلہ ء خیال ہوا۔

ملاقات میں سید علی زیدی نے 26 فروری کو گھوٹکی سے کراچی تک کیلئے ترتیب دیئے گئے “سندھ لانگ مارچ” کی تفصیلات سے وائس چیئرمین پی ٹی آئی مخدوم شاہ محمود قریشی کو آگاہ کیا۔

 مخدوم شاہ محمود قریشی کا کہنا تھا کہ سندھ حکومت کے کالے قانون کے خلاف ہر سیاسی جماعت سراپا احتجاج ہے، پاکستان تحریک انصاف سندھ کے غریب اور پسماندہ عوام کو تنہا نہیں چھوڑ سکتی۔

وزیر خارجہ مخدوم شاہ محمود قریشی نے کہا کہ ہماری جدوجہد سندھ کے امتیازی بلدیاتی نظام کی تبدیلی تک جاری رہے گی، پر امن مظاہرین کو منتشر کرنے کیلئے جس طرح ریاستی مشینری کا بے دریغ استعمال کیا گیا اور نہتے شہریوں کو تشدد کا نشانہ بنایا گیا اس کی جتنی مذمت کی جائے کم ہے۔

وزیر خارجہ و وائس چیئرمین پاکستان تحریک انصاف مخدوم شاہ محمود قریشی نے وفاقی وزیر سید علی زیدی کا شکریہ ادا کرتے ہوئے سندھ لانگ مارچ کی تیاریوں کے حوالے سے اطمینان کا اظہار کیا۔