میاں اسلم اقبال نے کہا ہے کہ پیسک چھوٹے صنعت کاروں کو سہولیات کی فراہمی کے لئے اقدامات کرے۔

صوبائی وزیر صنعت تجارت میاں اسلم اقبال کی زیر صدارت پنجاب سمال انڈسٹریز کارپوریشن کے بورڈ ممبران کا 118واں اجلاس ہوا جس میں انڈسٹریل اسٹیٹس میں پلاٹوں کی فروخت کی بجائے لیز پالیسی کا بھی جائزہ لیا گیا۔

اجلاس میں بورڈ نے پیسک ملازمین کی میرج گرانٹ کی مد میں بیٹی کی شادی کے لئے گرانٹ1لاکھ روپے تک کرنے کی منظوری دی جبکہ بورڈ نے کمالیہ اور حافظ آباد میں سمال انڈسٹریل اسٹیٹس کے قیام کی اصولی منظوری دی۔

پیسک آفس میں منعقدہ اجلاس کے دوران بورڈ نے انتظامی اور مالیاتی امور کی منظوری دی جبکہ بورڈ نے تجہیز و تکفین گرانٹ بھی 10ہزار روپے سے بڑھا کر 1لاکھ تک روپے تک کرنے کی منظوری دی۔

بورڈ نے سمال انڈسٹریل اسٹیٹ سندر 2 میں تعمیر کی مدت میں فروری 2024تک توسیع کی منظوری دی جبکہ بورڈ نے گجرات میں نئی انڈسٹریل اسٹیٹ اور سیالکوٹ میں سرجیکل سٹی کی قیام کے منصوبوں کو”ٹائم باونڈ پراجیکٹ“ڈیکلیر کرنے کی منظوری دی۔

صوبائی وزیر صنعت تجارت میاں اسلم اقبال نے دونوں سمال انڈسٹریل اسٹیٹس کے لئے اراضی کا جائزہ لینے کی ہدایت دی۔

میاں اسلم اقبال نے کہا کہ معاشی سرگرمیاں بڑھانے کے لئے پنجاب سمال انڈسٹریز کارپوریشن متحرک کردار ادا رکرے جبکہ پیسک چھوٹے صنعت کاروں کو سہولیات کی فراہمی کے لئے اقدامات کرے۔

صوبائی وزیر صنعت تجارت میاں اسلم اقبال نے مزید کہا کہ آئندہ اجلاس میں ڈیولپڈ پلاٹوں کی ادائیگی کے لئے ریلیف پیکیج بنا کر پیش کیا جائے۔

ایڈیشنل سیکرٹری صنعت وتجارت، ایم ڈی پیسک اور دیگر بورڈ ممبران نے اجلاس میں شرکت کی۔